Nadia Sàvchenko

Un article de Wikipèdia, l'enciclopèdia liura.
Anar a : navigacion, Recercar

Nadia Víktorivna Sàvchenko (en ucraïnian: Надія Вікторівна Савченко, en transcripcion internacionala Nadiya Savchenko; Kyiv, 11 de mai de 1981) es una oficièra de l'armada e presonièra politica ucraïniana. Foguèt una de las primièras femnas a venir pilòta d'aviacion. Es actualament la sola aviatritz ucraïnian del bombardièr Sokhòi Su-24 e de l'elicoptèr Mil Mi-24.

Venguèt famosa internacionalament en junh de 2014 quand foguèt capturada per las fòrças prorussas dins l'èst d'Ucraïna del temps que luchava amb lo Batalhon Aidar. Mai tard se vegèt transferida illegalament en Russia ont l'acusèron d'aver tuat dos jornalistas russas durant l'insurreccion de Donbàs.

Actualament detenguda dins una clinica psiquiatrica russa, a la debuta del mes d'octobre de 2014 foguèt plaçada en primièra posicion sus la lista de Batkivschyna per las Eleccions al Parlament Ucraïnian del 26 d'octobre del meteis an.

Biografia[modificar | modificar la font]

Nadia Sàvchenko nasquèt a Kyiv en 1981 dins una familha de classa mejana de la capitala. Son paire èra un engenhaire agricòla mentre que sa maire, Maria, trabalhava dins la concepcion de cargos. Amb sa sòrre Vira foguèron abalidas e educadas en ucraïnian. Ja que somiava dempuèi qu'èra pichona de pilotar un avion, quand faguèt 16 ans s'engatgèt dins l'armada ucraïniana e i trabalhèt coma operatritz de ràdio abans de s'entrainar per venir paracasudista.