Migracion deis aucèus

Un article de Wikipèdia, l'enciclopèdia liura.
Salta a la navegació Salta a la cerca
Migracion de Branta leucopsis en Finlàndia.

La migracion deis aucèus es una migracion animala regulària e sasoniera de foaça espècias d'aucèus. Aqueu desplaçament es, per exemple, lo biais per aqueleis espècias de s'escapar d'un cambiament d'abitat o de la baissa de disponibilitat de manjar liada emé lei rigors d'un climat desfavorable, mai es tanben la maximizacion deis oucasions de reproduccion. Durant lei gròs flux migratòris, s'obsèrva generalament l'activitat migratòria maximala a partir dau soleu tremont, e fins a miejanuech o 1 h de matin, puei la diminucion de l'activitat lo rèsta de la nuechada. A l'auba, lo nombre d'aucèus en voale aumenta de nòu (migrators diürnes aqueu còup).

Mai d'un fenomène aguèron tornat actualizar l'interès de l'estudi d'aquelei migracions. Toi leis observators constatan l'impacte dau rescaufament climatic sus la sedentarizacion creissenta de certaneis espècias coma la boscarla tèsta negra e Phylloscopus collybita. E mai per l'ivèrn, certans estornèus migran vèrs lei vilas pus au Nòrd onte ara tròban d'alimentacion e de refugis. En mai d'aquò, una melhora proteccion d'aqueleis animaus passa per la boana coneissença de sei migracions. Enfin, si coneis encara mau lei caracteristicas que permèton ais aucèus de s'ourientar. Leis aucèus poadon tanben transportar de propagules (micròbis, plantonas, parasites, uous de crustacèus, sus de gròssei distàncias, o de crustacèus vius sus de pichonei distàncias...). Si compren encara mau son ròtle en aquela matèria, mai sembla que sieche potencialament important. Pòu existir una predacion importanta durant la migracion, que probablament contribuisse a la seleccion naturala, a qué s'ajustan leis efècts de la caça (destorbe, prelevament, saturnisme...).