Maurici André

Maurici André (quartièr de Ròca Bèla, Alès, lo 21 de mai de 1933 ; en francés Maurice André) qu'ei un trompetista occitan de nacionalitat francesa e un deus màgers virtuòses d'aqueth instrument au long de la soa istòria per'mor de la soa poténcia dens lo registre suberagut qui ne he un mèste de l'interpretacion barròca o deus capricis escrivut per la trompeta (com lo Vòu deu Bordon o lo Carnavau de Venècia).

Que vadó dens las Cevenas en çò d'ua familha de minaires dab un pair musician amator. Eth medish que devarè au hons la mina dens la soa joentut abans d'entrar com trompetista dens l'armada entà poder estudiar a gratis au conservatòri. Au cap de pas sonque sheis mes qu'obtiengó lo purmèr prèmi.

Durant las annadas 60 e 70 qu'enregistrè ua piela d'òbras barròcas mes tanben contemporanèas, estant ambs repertòris hèra exigents fisicament e tecnicament entaus musicians.

Que cau brembar aquiu qu'a l'epòca barròca la trompeta qu'èra un instrument hèra limitat qui, privat de l'ajuda deus pistons (qui horen hornits au sègle XIX), non podèva pas prodúser sonque nòtas d'ua medisha seria armonica. Aquestas nòtas armonicas que son mei tanhentas e mei numerosas dens los aguts e, mei que mei dens los suberaguts. Las òbras barròcas vertaderament escrivudas per la trompeta que pujan donc hèra haut dens las nòtas suberagudas qui son las mei mauaisidas de prodúser e que son generaument intrerpretadas dab ua trompeta piccolo.

Maurici André n'a pas avut lo son parion per excellar dens aquestas òbras barròcas suberagudas (com, per exemple lo segond concerto brandeborgés de Johann Sebastian Bach) mes que desenvolopè tanben un repertòri navèth en interpretant transcripcions d'òbras originaument escrivudas per d'autes instruments (com, per exemple, lo clarin). Aquestas transcripcions que combinan sovent las dificultats d'anar dinc au suberagut e tanben l'emplec de cromatismes mauaisits.

Enter los sons nombrós eslhèves (que pòt quitament parlar de generacion de trompetistas influenciats per aqueth mèste), que cau mentàver Bernard Soustrot, Guy Touvron, Éric Aubier e Thierry Caens.

Maurici André qu'a un hilh trompetista e ua hilha clarinista ; ambs que dèn concerts dab lo lor pair.