Luòctenent-coronèu
Lo grade de luòctenent-coronèu es un grade d'oficier superior dins mai d'una fòrça armada. Se situa generalament au dessús dau grade de comandant (ò de major) e en dessota dau grade de coronèu. Un luòctenent-coronèu es generalament lo cap d'un batalhon, l'adjonch dau coronèu comandant un regiment ò lo cap dirècte d'un regiment.
Lo grade foguèt creat en França en 1668 dins lo quadre d'un projècte de promoccion d'oficiers competents au sen de l'armada de Loís XIV (1643-1715). A la diferéncia dei grades de capitani e de coronèu, èra pas crompable ni transmissible. Lei luòctenents-coronèus èran donc chausits per lo secretari d'Estat a la Guèrra entre lei capitanis experimentats. Aquò èra destinat a compensar la manca d'experiéncia e de competéncia dei coronèus qu'èran sovent d'aristocratas absents aguent crompat lo drech de formar ò d'entretenir un regiment. Lo grade foguèt suprimit per la Revolucion e restaurat après la casuda de Napoleon. En parallèl, foguèt pauc a cha pauc adoptat per d'autreis armadas.