Libe d'Estèr

Un article de Wikipèdia, l'enciclopèdia liura.
Un rotlèu d'Estèr redigit en Itàlia (1616). Bibliotèca Nacionau d'Israèl. Jerusalèm

Lo Libe d'Estèr, o Rotlèu d'Estèr (מגילת אסתר Megillat Ester en ebrèu), qu'ei lo vint-e-unau libe deu Tanaḥ (Bíblia ebraïca). Que hè partida deus Ketubim, qui forman la tresau e darrèra partida deu Tanaḥ. L'istoricitat deu raconte qu'ei mesa en dobte: que sembla lo libe qu'estó concebut com ua apologia de la hèsta de Purim.

Que conta ua seria de hèitas debanadas devath lo rei pèrsa Xerxes I (aperat Aḥašveroš en ebrèu, transcriut Asouēros dens la Bíblia deus Setanta, Assuerus dens la Vulgata): Estèr, d'origina judiva, qu'ei la favorita deu rei Assuèr (aqueth Assuèr qui regnava despuish Índia dinc a Etiopia sus cent vint-e-sèt províncias, ce ditz lo tèxt). Mes lo gran visir Haman qu'a a l'idèa d'exterminar tots los judius. Alavetz, Mardoquèu que crida ajuda a la soa cosia Estèr tà obtiéner deu rei l'anullacion deu decret qui'us condemna. Assuèr, assabentat per Estèr, que pren mesuras tà proteger la populacion judiva e que condemna Haman e tots los sons hilhs a estar penuts. Fin finau, los judius qu'instauran ua hèsta annau aperada Purim tà celebrar lo miracle.