Les Infidèles

Un article de Wikipèdia, l'enciclopèdia liura.

Les Infidèles es un group de rock francés fondat dins la Franca Comtat de caps 1983, desseparat en 1997, mès qui s'es tornat formar en 2007.

Biografia[modificar | Modificar lo còdi]

Les Infidèles èra l'un dels grops los mai populars de la scèna rock exagonala dins la primièra partida de las annadas 90, còsta la Mano Negra, Noir Désir o encara Elmer Food Beat. Fondat a Lons-le-Saunier dins las annadas 80 per Jean Rigo a la guitarra e au cant, Olivier Derudet a la bassa e Jo Matiss a la batariá, enregistran tre 1984 un primièr 45 torns Fin d'une histoire / Sally, puèi un segond Toutes les nuits, toute ma vie / Mélodie.

En 1989, signan un contrat ambe la maison de disc Tréma. Aital, enregistran un primièr vertadièr album estudiò : Rebelle. Lo primièr 45 torns eissit d'aqueste album, Mon héroïne, es plan recebut : au debut de l'annada de 1990, te passa sovent sus las ràdios generalistas, se vend plan, es un polit succès d'estima, chic se'n manca per que siaga un tube. Publican en seguida un segond 45 torns : Non plus de sang. Lo tresen extrèit de l'album au mes de setembre de 1990 es Rebelle, la cançon que li balhèc lo nom. Aqueste còp, i sèm : Rebelle es un tube en França tota a la fin de l'annada de 1990.

D'ara enlà grop reconegut, Les Infidèles enregistran un segond album en 1992 : Héritage. Lo single Les larmes des maux deveng un gròs tube de l'ivèrn 1992-1993[1], e demòra uèi encara lor cançon la mai coneguda[2]. Dos autres singles tirats de l'album Héritage van sortir en 1993 e coneisser tanben en seguida una petita capitada : Comme une chatte e En disgrâce.

A partir de la segonda mitat de las annadas 90, la popularitat del grop baissa : los albums Human Way Of Life (1995) e Ailleurs (1997) se vendon mal, nat tube dins aquesta periòda, lo grop s'alassa e se dessepara en 1997.

Pr'aquò, au cap de dètz ans, lo grop s'es tornat formar. Comencèt per sortir lo single Cirkus en 2007, puèi dos albums estudiòs, Turbulences en 2010 e Cortex en 2019. An tanben publicat en 2017 un album live enregistrat sus l'empont, Le cœur des foules.

Discografia[modificar | Modificar lo còdi]

  • 1989: Rebelle
  • 1992: Héritage
  • 1995: Human Way Of Life
  • 1997: Ailleurs
  • 2007: Cirkus
  • 2010: Turbulences
  • 2019: Cortex

Cançons mai conegudas[modificar | Modificar lo còdi]

  • Mon héroïne (1989)
  • Rebelle (1990)
  • Les larmes des maux (1992)
  • Comme une chatte (1993)
  • En disgrâce (1993)

Referéncias[modificar | Modificar lo còdi]

  1. http://www.chartsinfrance.net/Les-Infideles/Les-larmes-des-maux-sc1587.html
  2. https://mytaratata.com/taratata/2/les-infideles-les-larmes-des-maux-1993