Kyrkbron

Un article de Wikipèdia, l'enciclopèdia liura.
Salta a la navegació Salta a la cerca
Vista aeriana del Kyrkbron (primièr pont sus la fòto)

Lo Kyrkbron (nom suedés compausat de kyrk ("glèisa) e bro ("pont"), valent a dire en occitan: "Pont de la Glèisa") es un pont de beton que passa ensús del flum Ume dins la vila suedesa d'Umeå. Es lo tresen pont dels mai ancians que se bastiguèron dins la localitat per poder traversar lo flum. La construccion del pont comencèt en 1972 e durèt tres ans. Lo pont, qu'èra estat concebut per far mermar lo trafic important que passava pel pont sonat Tegsbron, foguèt inaugurat e dobèrt lo 26 de setembre de 1975.

Lo Kyrkbron compren doas vias parallèlas que s'espandisson sus 391 mètres, e sa largor mesura entre 11 e 19 m a l'oèst e entre 13 e 20 m a l'èst.

Son trafic actual es estimat a 13.300 veiculs e 1.900 bicicletas per jorn.

Istòria[modificar | modificar la font]

Vista actuala del Gamla bron, lo pont mai ancian d'Umeå sul flum Ume

Lo desvolopament e la creissença d'Umeå faguèt que la vila necessitèsse cada còp mai de vias de comunicacion mai nombrosas per regular son trafic e facilitar la circulacion e los transpòrts. Fins a la debuta del sègle XX, existissiá sonque un pont, lo Gamla Bron, que traversava lo flum Ume.

Las originas[modificar | modificar la font]

Ja tre las annadas 1930 venguèt evident que lo Gamla Bron seriá pas mai capable de suportar l'aumentacion constanta del trafic. Lo conselh administratiu del Comtat de Västerbotten demandèt alara a l'engenhaire de rotas O. H. Grahnén de crear lo plan d'una òbra novèla, de dessenhar un pont novèl o de reconstruire lo pont existent per portar una solucion als problèmas que se pausavan.

Grahnén presentèt sa proposicion davant la comission lo 16 de julh de 1936, e mostrèt totas las solucions qu'aviá envisatjat. Demest totas aquelas, existissiá un projècte que prepausava de far del pont una extension de la carrièra sonada Östra Kyrkogatan, fins a la Glèisa de la vila d'Umeå. Lo problèma màger d'aquesta opcion èra que l'inclinason del pont geinava la circulacion fluviala e que se deurián installar doncas de parts mobilas e levadissas o una nautor liura per defugir aquesta dificultat. Pasmens tot aquò foguèt considerat tròp car en aquel moment, e doncas se causiguèt la solucion principala de Grahnéns de barrar lo trafic automobil sul pont vièlh e de bastir un autre pont a l'extension de l'Esplanada Västra.