Joan II (papa)

Un article de Wikipèdia, l'enciclopèdia liura.
Salta a la navegació Salta a la cerca
Retrach dau papa Joan II dins la Basilica de Sant Pau Fòra lei Muralhas.

Joan II (nascut vèrs 470 - mòrt lo 8 de mai de 535) foguèt lo 56en papa de la Glèisa Catolica Romana dau 2 de genier de 533 au 8 de mai de 535. Succediguèt a Bonifaci II (530-532) e foguèt remplaçat per Agapet Ièr.

Èra originari de Roma e sembla acomençar sa carriera eclesiastica dins la Basilica Sant Clement de Latran. Son eleccion se debanèt dins un contèxte malaisat en causa de la corupcion dau clergat roman que participava a la venda dei bens e dei cargas de la Glèisa après la mòrt d'un papa (simonia). Pasmens, a la mòrt de Bonifaci II (530-532), aqueu comèrci conoguèt una amplor novèla car empachèt l'eleccion d'un papa novèu durant dos mes. Aquò entraïnèt l'intervencion dau Senat roman e dau rèi ostrogòt per reglar la situacion. En particular, lo Senat adoptèt un decrèt sevèr per limitar la (simonia) dins lo corrent de l'eleccion pontificala. Aqueu decrèt foguèt confirmat per lo rèi Atalaric.

Dins lo corrent de son pontificat, Joan II gardèt de relacions bònas amb Atalaric e ambé l'emperaire Justinian. Ansin, condamnèt lei tèsis dei monges acemetes que luchava còntra l'òbra teologica de l'emperaire en despiech de l'oposicion entre la doctrina defenduda per Justinian e aquela dei papas. Deguèt tanben s'ocupar de l'afaire de l'evesque de Riés, Contumeliosus, que foguèt despausat e remplaçat en causa d'una acusacion grèva d'adultèri. Enfin, l'afaire pus important de son periòde aguèt luòc quauquei mes avans sa mòrt quand un concili de 217 evesques reünits en Cartage li demandèt l'atitud d'adoptar en fàcia deis evesques qu'avián professat l'arianisme avans de se pentir. Pasmens, Joan II moriguèt avans d'aver publicat sa respònsa que foguèt donada per son successor Agapet Ièr (535-536).

Liames intèrnes[modificar | modificar la font]

Bibliografia[modificar | modificar la font]

Nòtas e referéncias[modificar | modificar la font]