Batalha de Tortor

La batalha de Tortor se debanèt en 973 entre lei fòrças dau còmte de Provença Guilhèm I^èr de Provença e lei fòrças dei Sarrasins installats dins la region dempuei lo sègle precedent. Èra la consequéncia d'una tièra de victòrias dei Provençaus dins leis Aups e s'acabèt per una victòria novèla qu'entraïnèt de pèrdas importantas dins l'armada sarrasina. Après aquela desfacha, lei Sarrasins assaièron de gropar sei darrierei tropas a La Gàrdia Frainet onte foguèron definitivament batuts dins lo corrent de l'annada. Lei populacions musulmanas provençalas, installadas lòng dau litorau ò dins lei montanhas, deguèron alora quitar la region ò se convertir. Certanei foguèron utilizats coma esclaus. Aquela victòria permetèt tanben au còmte Guilhèm d'instaurar per lo premier còp l'autoritat dei còmtes de Provença sus tota la region.