Canon de 75 mm modèl 1897

Fotografia dau canon de 75 mm modèl 1897 expausat au musèu de l'Armada.

Lo canon de 75 mm modèl 1897 es una pèça d'artilhariá de campanha francesa intrada en servici en 1897. Capable de tirar 20 còps per minuta a una distància eficaça de 6 500 m, èra un canon fòrça avançat a son epòca gràcias a l'utilizacion de pouvera sensa fum, d'una municion encartochada, d'un cargament per la culassa e d'un fren oleopneumatic. Aquela combinason d'innovacions permetèt d'aumentar considerablament la cadéncia dei tirs. Lo 75 mm èra ansin fòrça superior a la pèça equivalenta de l'armada alemanda, lo canon de 77 mm FK 96, e foguèt subrenomat lo « canon rèi » dins l'artilhariá francesa.

Equipèt l'artilhariá de campanha francesa durant tota la Premiera Guèrra Mondiala (1914-1918). Aguèt un ròtle major dins lo succès francés lòng de Marna, mai èra pauc adaptat a la guèrra de trencadas. Lo desvolopament d'una artilhariá pesuca foguèt necessari per corregir aqueu problema. Lo canon foguèt tornarmai utilizat durant la Segonda Guèrra Mondiala, mai l'abséncia de motorizacion limitèt sei performàncias. Foguèt alora generalament convertit en pèça anticarri per lei fòrças francesas e alemandas. Après 1945, foguèt pontualament utilizat per lei Francés en Indochina e en Argeria.

Liames intèrnes

• Artilhariá de campanha.
• Canon de 77 mm FK 96.

Bibliografia

• (fr) J. Ettrick, « Le canon de 75 mm », Connaissance de l’histoire mensuel, Hachette, n° 46,‎ junh de 1982, pp. 46-51.