Campanha d'Atlanta
La campanha d'Atlanta es una campanha militara de la Guèrra de Secession que se debanèt dau 7 de mai au 2 de setembre de 1864. Opausèt leis armadas nordistas de Mississipí comandadas per lo generau William T. Sherman (98 500-112 000 òmes) a l'armada sudista de Tennesse dirigidas per lei generaus Joseph E. Johnston e John Bell Hood (50 000 a 65 000 òmes).
Après sa victòria de Chattanooga (23-25 de novembre de 1863), l'Union decidèt de preparar una ofensiva en direccion d'Atlanta e de l'ocean per atacar lo còr dau territòri confederat. La premiera partida de la campanha veguèt lo generau Johnston se retirar vèrs Atlanta en assaiant d'alentir son adversari e de blocar sei temptativas d'enceuclament. Pasmens, l'abandon d'un terren montanhós sensa batalha importanta foguèt durament criticat e Johnston foguèt remplaçat per lo generau Hood, jutjat pus agressiu, lo 20 de julhet. Hood abandonèt l'estrategia de Johnston, que voliá destrurre la logistica de Sherman au profiech d'una defensa pus ofensiva. Pasmens, seis atacas li permetèron pas de rompre leis armadas nordistas e lei dos camps enregistrèron de pèrdas similaras durant aquelei combats. Ansin, lei fòrças de Sherman poguèron pauc a pauc aprofichar sa superioritat numerica per menaçar lei linhas d'avitalhament de Hood. Lo 1èr de setembre, lei sudistas deguèron donc abandonar la vila que foguèt presa lo 2 per lei tropas de l'Union.
La conquista d'Atlanta foguèt un succès important per lo Nòrd car permetèt a Sherman d'organizar la seguida de son ofensiva. Per lo Sud, èra una desfacha grèva mai Hood poguèt tornar organizar sei fòrças per menar una ataca vèrs lo nòrd, dirèctament còntra la logistica de Sherman. Pasmens, aquò mau capitèt e menèt ai batalhas de Franklin e de Nashville en novembre e decembre de 1864. Lo bilanç uman de la campanha es relativament saunós amb 31 687 pèrdas dins lei rengs nordistas (dont 4 423 mòrts) e 34 979 dins lei rengs sudistas (dont 3 044 mòrts).