Bibliotèca de l'Universitat d'Umeå
La Bibliotèca de l'Universitat d'Umeå (en suedés: Umeå universitetsbibliotek), sovent coneguda per las siglas UmUB, es la bibliotèca mai granda de la region de Norrland.
Creada en 1964 gràcias a una part del fons de la bibliotèca de la vila, es una de las sèt bibliotècas de Suècia que, coma o especifica la lei, recebon dirèctament un exemplar de totes los libres publicats pels editors suedeses.
Son fons compta actualament a l'entorn d'1,5 milion d'òbras.
Istòria[modificar | Modificar lo còdi]
L'embrion de la Bibliotèca de l'Universitat d'Umeå nasquèt amb l'espelida de la Bibliotèca Scientifica de la vila (en suedés: Vetenskapliga biblioteket i Umeå) que foguèt crada en 1950 al sen de la Bibliotèca municipala. Tre l'an seguent l'institucion novèla foguèt reconeguda coma de primièr òrdre pel nòrd de Suècia.
Se desvolopèt puèi dapasset per créisser e poder prestar sos servicis a la recerca e a l'ensenhament universitari. Coneguèt una reorganizacion ulteriorament per venir la Bibliotèca de l'Universitat d'Umeå quand aquesta foguèt fondada en 1965. Son evolucion contunhèt amb la construccion d'un bastiment novèl sul campus de l'Universitat, que s'inaugurèt en 1968. Coneguèt tanben d'expansions notablas posteriorament, subretot en 2006.
Recentament lo fons de la bibliotèca s'es enriquit considerablament e constament, subretot gràcias a las donacions de mantuna personalitat suedesa, coma per exemple l'istorian Nils Ahnlund, lo lingüista Björn Collinder, l'economista politic Eli Heckscher e la jornalista e escrivana Sigrid Kahle demest maites autres. Los archius de recerca de la bibliotèca contenon tanben un fons de documents de l'escrivana Sara Lidman.