Beneset VIII
Beneset VIII (vèrs 980, Latium - 9 d'abriu de 1024, Roma) foguèt lo 143en papa de la Glèisa Catolica dau 18 de mai de 1012 au 9 d'abriu de 1024. Succediguèt a Sèrgi IV (1009-1012) e foguèt remplaçat per Joan XIX (1024-1033).
Après un començament de pontificat trebolat per la temptativa d'usurpacion menada per l'antipapa Gregòri VI, Beneset VIII concentrèt son rèine sus la lucha còntra lei Sarrasins. D'efiech, Itàlia èra dempuei lo començament dau sègle XI la buta d'incursions maritimas organizadas a partir dei posicions conquistas per lei musulmans en Sicília. Assaiant d'empedir lei conflictes entre vilas e senhors italians, Beneset VIII sostenguèt totei leis operacions militaras còntra lei Sarrasins coma la defensa de Sardenha per Pisa e Gènoa (1015-1016) e l'installacion dei Normands dins lo sud de la peninsula.
Regardant leis afaires intèrnes de la Glèisa, organizèt un sinòde per perseguir la lucha còntra la simonia e contunièt de renfòrçar lo poder de l'evescat de Bamberg, cargat d'evangelizar leis Eslaus.