Batalha de Mers el Kebir
La batalha de Mers el Kebir se debanèt lo 3 de julhet de 1940 durant la Segonda Guèrra Mondiala. Opausèt una flòta britanica a una flòta francesa en cors de desarmament dins la basa navala de Mers el Kebir. L'objectiu britanic èra de neutralizar lei naviris francés per empachar Alemanha ò Itàlia de se'n apoderar e de menaçar la supremàcia maritima de Londres. Après de negociacions que mau capitèron regardant la possibilitat per lei vaissèus francés de s'enfonsar volontàriament, de jónher un pòrt britanic ò leis Antilhas, lei Britanics bombardèron per suspresa l'esquadra francesa qu'èran pas lèsta per se defendre. La batalha s'acabèt donc per un chaple causant la mòrt de 1 297 marins francés, la pèrda de dos cuirassats e la neutralizacion de dos crosaires, d'un cuirassat suplementari e d'un còntratorpilhaire. Leis autrei naviris capitèron de sortir dau pòrt e de s'enfugir. De son caire, lei Britanics perdiguèron solament dos tuats.
En parallèl de la batalha de Mers el Kebir, d'autreis operacions permetèron de neutralizar lei naviris francés situats dins de pòrts britanics, especialament aquelei de la basa d'Alexàndria (fòrça X).