Étienne Fay

Étienne Fay (Tors, 1770 - Versalhas, 6 de decembre de 1845) foguèt un compositor e actor francés.

Biografia

Étienne Fay foguèt un compositor pro apreciat e conegut qu'escriguèt divèrses opèras amb un succès variable. En 1790 faguèt l'actor al teatre Louvois, puèi trabalhèt al teatre Favart en 1792 abans d'arribar a Feydeau ont partatgèt un emplec de primièr tenòr de 1796 a 1801. Viatgèt qualques temps dins mantun endrech e passèt un còp a Brussèlas en genièr de 1803. Ensagèt de portar la direccion del teatre de Marselha de 1810 a 1813 mas l'afar fracassèt.

Se maridèt amb la cantairitz Jeanne Rousselois, e amassa aguèron un dròlle Jean-Jacques Auguste (1792), escaissat "Baron", e doas filhas Élisa (en 1806), Léontine (en 1810) que venguèt una actritz plan celèbra.

Demest sas opèras mai apreciadas cal citar l'Intérieur d'un ménage républicain que coneguèt una bèla capitada.

Òbras

• Flora, opèra de tres actes (paraulas de Dubuisson).
• L'intérieur d'un ménage républicain, opèra comica d'un acte.
• Rendez-vous espagnol, opèra comica de tres actes (paraulas de Coffin-Rosny).
• Clémentine ou la Belle-mère, opèra comica d'un acte (paraulas de Vial)
• Emma ou le Soupçon, opèra comica d'un acte (paraulas de Marsollier)
• Julie ou le Pot de fleurs, opèra comica d'un acte (paraulas de Jars)