Treble bipolar

Un article de Wikipèdia, l'enciclopèdia liura.

Lo treble bipolar (var. trèbol bipolar) es una malautiá mentala caracterizada per d'alternanças de periòdes de depression, de periòdes d'elevacion de l'umor (mania) e de periòdes normaus. Durant lei periòdes de mania, lo comportament de l'individú es anormalament energic, urós ò irritable e lo besonh de sòm es generalament reduch[1]. Lo destriament es alora sovent alterat e lo malaut pòu prendre de decisions sensa se preocupar de consequéncias. En revènge, durant lei periòdes de depression, l'individú tend a s'isolar e a portar un regard negatiu sus la vida. Lei riscs de suicidi e de bleçaduras autoinfligidas aumentan dins lo corrent d'aqueleis episòdis[1]. Aquò pòu entraïnar de problemas sociaus (estigmatizacion, estereotipes, prejutjats...) e pòu donar luòc a una reconóissença d'andicap. La prevalença es estimada a 1% ò 2% de la populacion dins lei país desvolopats.

Lei causas de la malautiá son mau conegudas mai de factors genetics e environamentaus semblan tenir un ròtle. D'efèct, plusors gèns, generalament liats ai mecanismes de produccion e de regulacion dei neurotransmeteires, son estats identificats coma fònts d'aumentacions leugieras dau risc de desvolopar un treble bipolar[2]. Regardant l'environament, de trebles dins lo corrent de l'enfança, l'estrès, la consumacion de drògas, de cambiaments sociaus importants (cambiaments de trabalh, desmainatjament...) ò de malautiás mentalas coma l'iperactivitat e l'esquizofrenia pòdon explicar l'aparicion d'un treble bipolar.

Lo diagnostic es malaisat. Necessita de recèrcas sus d'antecedents entre lei parents e lei rèires dau malaut e l'estudi de sa vida en cèrca de periòdes d'exaltacion, de depression, de comportaments originaus ò anormaus, de trebles alimentaris, de trebles ansiós e de trebles obsessionaus. En causa de la multiplicitat dei causas possiblas, lo tractament es complèx e s'organiza sus plusors nivèus : igièna de vida, tractament medicamentós (principalament lo carbonat de lití), psicoterapia e amainatjament de l'environament.

Liames intèrnes[modificar | Modificar lo còdi]

Bibliografia[modificar | Modificar lo còdi]

  • (fr) Marc-Louis Bourgeois, Christian Gay, Chantal Henry e Marc Masson, Les Troubles bipolaires, Lavoisier, 2014.

Nòtas e referéncias[modificar | Modificar lo còdi]

  1. 1,0 et 1,1 (en) Anderson, IM ; Haddad, PM ; Scott, J., "Bipolar disorder", BMJ (Clinical research ed.) 345 : e8508.
  2. (en) Goodwin, Guy M., "Bipolar disorder", Medicine 40 (11): 596–598.