Rosetta (sonda)

Un article de Wikipèdia, l'enciclopèdia liura.
Anar a : navigacion, Recercar
Modèl creat per ordinador de Rosetta

Rosetta es una sonda espaciala, e a l'encòp tanben lo nom d'una mission, de l'Agéncia Espaciala Europèa (ESA). Son objectiu principal es de reculhir de donadas sus la composicion del clòsc de la cometa Choriómov-Herassymenko e sus son comportament còsta lo Solelh. Son nom li ven de la Pèira de Roseta que l'idèa es que l'engenh ajudarà a collectar pro d'entresenhas per comprendre las primièras etapas de la formacion del Sistèma Solar. A mai s'es la seisena sonda a observar una cometa a una distància febla, es pr'aquò la primièra a se situar en orbita a l'entorn d'aquesta e a depausar una sondeta aterradoira sus son nogalh.

L'aparelh qu'aviá una massa iniciala de tres tonas, foguèt lançat dempuèi Kourou per una fusada Ariane 5 G+ lo 2 de març de 2004. Aviá coma objectiu de se plaçar en orbita a l'entorn de la cometa e puèi, aprèp una fasa d'observacion de maites meses, deviá mandar Philae, una sondeta aterradoira de 100 kg, per tal que se pausèsse sus la susfàcia de la cometa per n'analisar la composicion de son sòl.

Mai de 10 ans aprèp sa partença, lo 6 d'agost de 2014, la sonda espaciala se placèt finalament en orbita a l'entorn de Choriómov-Herassymenko.

Instruments scientifics de l'orbitador[modificar | modificar la font]

Los tecnicians installan ALICE a bòrd de la sonda New Horizons, lançada en genièr de 2006.
Una de las sondas de Langmuir a bòrd de Rosetta

La carga utila de l'orbitador compren onze instruments scientifics que tenon una massa de 165 kg:

  1. ALICE (Ultraviolet Imaging Spectrometer) es un espectromètre imatjador ultraviolet semblable al que foguèt embarcat sus la sonda New Horizons destinat a analisar la composicion de la comèta, de sa coa e la produccion d'aiga e mai de monoxid e dioxid de carbòni del nogalh. D'un pes de 3,1 kg, aqueste instrument fabricat als Estats Units consoma 2,9 W.
  2. CONSERT (Comet Nucleus Sounding Experiment by Radiowave Transmission) es un sondador radiofrequéncia concebut per estudiar l'estructura intèrna del nogalh.
  3. COSIMA (Cometary Secondary Ion Mass Analyser) es un espectromètre de temps de vòl que deu analisar la composicion dels grans de pols emeses per la comèta pr'amor de determinar se sont organics o pas.
  4. GIADA (Grain Impact Analyser and Dust Accumulator) deu mesurar lo nombre, la massa, la distribucion dels vectors de dispersion (velocitat, direccion) dels granets de pols escampats per la cometa e reflectits per la pression de radiacion.
  5. MIDAS (Micro-Imaging Dust Analysis System) a per tòca d'estudiar la talha, la forma e lo volum de las particulas a l'entorn de la cometa.
  6. MIRO (Microwave Instrument for the Rosetta Orbiter) es un radiotelescòpi que foncionan dins la benda millimetrica e submillimetrica, qu'a per foncion mai que mai de determinar la temperatura de la susfàcia e de distinguir las parts de la susfàcia cobèrtas de particulas de pols e de glaç, qu'aquestas informacions son primordialas per tal de determinar los lòcs d'aterratge mai propicis.