Garda pretoriana
La garda pretoriana es una unitat militara de l'armada romana qu'èra encargada de la proteccion personala de l'emperaire. Creada per August, la garda èra l'unica unitat militara que podiá intrar armada dins l'encencha sacrada de Roma. Sei soudats avián tanben d'avantatges importants a respècte dei tropas normalas (durada de servici pus corta, sòlda pus importanta...). Pasmens, podián tanben servir dirèctament sus lo prat batalhier coma unitat de resèrva. Seis efectius iniciaus èran de 4 500 òmes mai son volum aumentèt pauc a pauc per agantar 15 000 òmes a partir de la segonda mitat dau sègle II apC.
La garda pretoriana prenguèt rapidament una gròssa importància dins la vida politica de l'Empèri car podiá aisament proclamar un emperaire. Ansin, tre lo rèine de Claudi (41-54 apC), leis emperaires prenguèron l'abitud de pagar de primas excepcionalas (donativum) ai pretorians per s'assegurar de lor fidelitat. Lo donativum venguèt ansin pauc a pauc obligatòri au començament d'un rèine e per celebrar d'eveniments importants per la familha imperiala (naissença, maridatge...). En causa d'aqueu poder, lei pretorians èran pauc populars. Ansin, après l'anientament de la garda a la batalha dau pònt Milvius, Constantin Ièr decidèt de la dissòudre definitivament en 313.
Liames intèrnes[modificar | Modificar lo còdi]
Bibliografia[modificar | Modificar lo còdi]
- (fr) Marcel Durry, Les cohortes prétoriennes, De Boccard, 1938.