Eugène Varlin

Un article de Wikipèdia, l'enciclopèdia liura.
Anar a : navigacion, Recercar
Eugène Varlin

Eugène Varlin (Claye-Souilly, 1839París, 1871) foguèt un sindicalista francés e una personalitat de la Comuna de París (1871).

Mestierau religaire, participèt en 1857 a la creacion de la societat de secors mutuau dei religaires. Puei, animèt la cauma deis obriers religaires de París pendent leis annadas 1864-1865. Creèt tanben la caissa d'esparnha e de crèdit mutuau dei religaires. Foguèt lo premier president d'aquela caissa. Membre de l'Internacionala dempuei 1865, participèt ai congrès de Londres (1865) e Genèva (1866). Lo 14 de novembre de 1869, son trabalh sindicau permetèt la creacion de la Federacion parisenca dei societats obrieras, que vendriá la CGT. Foguèt arrestat en 1868, 1869 e 1870 mai capitèt la creacion de las seccions de l'Internacionala a Lion, Le Creusot e Lilla.

Pendent lo sètge de París de 1870-1871, foguèt elegit comandant dau 193en batalhon de la Gàrdia Nacionala. Revocat après l'insurreccion dau 31 d'octòbre de 1870, terminèt lo sètge en creant una organizacion de distribucion de repais ai paures de la capitala ambé Nathalie Lemel. Lo 18 de març de 1871, participèt ai combats de la plaça de Vendôme e foguèt elegit membre de la Comuna lo 26 per lei VIen, XIIen e XVIIen arredoniments. Faguèt partida de la Comission dei finanças. S'opausèt a la creacion dau Comitat de Salut Public e a l'execucion deis ostatges de la carriera Haxo. Durant la Setmana Saunosa, se batèt a la crosiera de la Croix-Rouge (23-24 de mai), a l'entorn dau Panteon (24 de mai) e dins lo quartier de Belleville.

Capturat lo 28 de mai de 1871, foguèt linsat puei fusilhat a Montmartre.