Didier Codorniou

Didier Codorniou (2006)

Didier Codorniou, nascut lo 13 de febrièr de 1958, a Narbona (Auda), es un jogaire de rugbi de XV e òme politic francés. Foguèt un dels melhors tres quarts centre del mond malgrat son pichon gabarit.

L'esportiu

Carrièra

Element talentuós dels juniors del Racing club narbonés, lèu ven en equipa primièra. Comença a 17 ans amb François Sangalli e Jo Maso, que se n'inspira, contunhent atal la linhada dels grands tres quarts centre de çò nòstre.

En 1986, intra a l'Estade Tolosenc, ont es associat amb Denis Charvet al centre. Servís pel melhor las atacas amb de passas subtas e sa luciditat, essent un jogaire viu e mobil, amb una tecnica subtila. A la cima de son art, après un desacòrdi amb la FFR, es pas mai seleccionat en equipa nacionala.

Enseguida joga pel club de Vilafranca de Lauragués e torna a son club narbonés ont acaba la carrièra esportiva.

En club

• Aviron Grussanés 1967-1973 (escòla de rugbi)
• RC Narbona a partir de 1973 (joves); 1975-1986
• Estadi tolosenc 1986-1989
• Fotbal club vilafranqués 1989-1991
• RC Narbona 1991-1994

Equipa de França de rugbi de XV

Didier Codorniou foguèt seleccionat lo 7 de julhet de 1979 contre los All Blacks. Foguèt seleccionat 32 còps: 3 en 1979, 4 en 1980, 4 en 1981, 7 en 1983, 7 en 1984, 6 en 1985 e marquèt 5 ensags (20 punts).

Carrièra politica

Percors

Candidat socialista, es elegit conse màger de la vila de Grussan en 2001, puèi ven conselhièr regional (president de la comission de los esports de la region Lengadòc Rosselhon) en 2004.

Es reelegit al conselh municipal en 2008 amb 83,84 % dels vòtes al primièr torn.

A las eleccions regionalas de 2010, es cap de lista per Aude de la lista de Georges Frêche e es elegit. Lo 23 de febrier de 2010, es exclusit del Partit socialista a causa de son raliament a Georges Frêche. Ven vice president de la region Lengadòc Rosselhon encagat de las finanças.

A la diferencia dels cocandidats a las eleccions regionalas, sollicitèt pas son retorn al PS, se presenta a las eleccions legislativas de 2012 jos la bandièra esquèrra divèrsa dins la 2a circonscripcion d'Aude.

En 2014, es reelegit conse de Grussan al primièr torn amb 76,56 % dels vòtes. Se jonh al Partit radical d'esquèrra en octobre de 2014.

Lo 4 de genièr de 2016, es elegit 4n vice president de la region Lengadòc Rosselhon Miègjorn Pirenèus jos la bandièra del Partit radical d'esquèrra. Es en carga l'economia maritima, lo litoral e los aeropòrts.

Mandats

• Conse màger de Grussan (depuèi 2001)
• Vice President de la Region Lengadòc Rosselhon Miègjorn Pirenèus (dempuèi 2016)

Ligams extèrnes

• (en) Didier Codorniou sur espnscrum.com (biografia, imatges, estatisticas en equipa nacionala en destalhs, actualitars)
• Portrait de Didier Codorniou Archives de l'INA -2002
• "son site web"