Caracalla

Un article de Wikipèdia, l'enciclopèdia liura.
Anar a : navigacion, Recercar
Representacion de l'emperaire de Caracalla.

Caracalla (4 d'abriu de 188, Lugdunum - 8 d'abriu de 217, vèrs Harran) foguèt un emperaire roman. Venguèt oficialament coemperaire de son paire Septimi Sever en 196 e li succediguèt ambé son fraire Geta, tanben coemperare dempuei 198, lo 5 de febrier de 211. Pasmens, tre lo 26 de decembre de 211, assassinèt son fraire e venguèt emperaire unic fins a sa mòrt. Foguèt remplaçat per Macrin.

Coma Neron o Commòde, son rèine foguèt considerat coma una tirania sanguinaria e Caracalla tèn una imatge marrida. D'efèct, l'assassinat e lo chaple d'opausants — Alexàndria foguèt pilhada en causa d'una satira còntra l'emperaire en 215 — entraïnèron una impopularitat fòrça importanta e Caracalla foguèt finalament assassinat durant una campanha en Orient. Dins aquò, la politica generala de Caracalla aguèt una influéncia importanta per la seguida de l'Empèri car sei campanhas militaras permetèron d'afeblir lei Germans fins au rèine de Sever Alexandre. Estendèt tanben lo drech de ciutadanatge a totei leis abitants de l'Empèri.