NGC

Lo New General Catalogue o NGC es un dei catalògues astronomics mai coneissuts dins lo domeni de l'astronomia amatora, ambé lo catalògue Messier.

Contèn 7 840 objècts dau cèu prefond (principalament de galaxias, mai pas solament) recensats per John Dreyer fins en 1888, data de la premiera publicacion dau catalògue dins lei Memoirs of the Royal Astronomical Society. Aqueu catalògue es una revision e un alargament dau General Catalogue de William Herschel que pareissèt en 1864, en qué pòrta de melhoraments nombrós. Dreyer classèt leis objècts de l'NGC còmpte tengut de son ascension drecha, çò que permete de dedurre lo melhor moment de l'an per leis observar. Maugrat la dificultat que presentan certans d'aqueleis objècts, l'NGC s'utiliza fòrça per leis amators, mai tanben per lei professionaus que coma aquò an accès ais objècts mai accessibles dau cèu prefond - ensin fòrça objècts NGC faguèron l'objèct d'estudis aprefondats. Pasmens aqueu catalògue conteniá encara de doblons e imprecisions nombrós e doncas si faguèt remplaçar per l'RNGC (Revised New General Catalogue), establit per Sulentic e Tifft (1973).

John Dreyer perseguissèt seis enquistas après la publicacion de l'NGC e presentèt en 1895 e en 1908 (version aumentada) un catalògue complementari de 5 386 objècts, lo catalògue IC (Index Catalogue I e II), que portèt lo nombre d'objècts repertoriats per Dreyer a mai de 13 000. Fin finala leis objècts dei catalògues NGC e IC originaus siguèron en partida corregits en 1988 (sieche exactament un sègle après lo catalògue NGC originau) per Roger Sinnott per formar lo catalògue NGC 2000.0 que s'utiliza encuei. Un autre projèct de correccion deis NGC e IC es lo Projèct NGC/IC. A l'ora d'ara la correccion mai completa deis NGC e IC si faguèt per Wolfgang Steinicke, ancian collaborator dau Projèct NGC/IC - aquela version s'utiliza per fòrça sistèmas informatizats de contraròtle de telescòpi.