Chapela de Sent Aurelhan de Limòtges
La chapela de Sant Aurelhan de Lemòtges es 'na bastissa religiosa daus segles XV e XVII qu'abriga de las relíquias dau segond evesque de 'quela vila. 'Questa pita chapela aparten a la Confrairiá de Sant Aurelhan, eretiera directa de l'anciana corporacion daus bochiers de Limòtges.
A l'origina, fuguet bastida per reculhir de las relíquias de Sant Aurelhan que se trobavan alara dins l'egleisa de Sant Cessator (o Cessadre o Cossadre o Sadre) (despareguda, situada en bas de l'actuala charriera daus Penitents Roges), qu'èra alara en roïnas. Au segle XVII, lo còr fuguet enlarjat e decorat dins l'estil barròc. A la Revolucion Francesa, fuguet venduda coma ben nacionau e crompada per un membre de la confrairiá de Sant Aurelhan: 'questa darriera n'es tre alara la proprietària. Es enguera un luec de culte important per los abitants dau quartier de la Bochariá e los membres de la confrairiá.
