Astroblèma de Rechoard-Chassanom

Imatge de sintèsi del cratèr qualques ans aprèp l'impacte

L'astroblèma de Rechoard-Chassanom, tanben apelat lo «meteorit de Rechoard», es un ensems de traças laissadas en Lemosin per l'impacte d'un asteroïde tombat fa pus de 200 milions d'ans çò que lo fa contemporanèu de l'escantiment massís del Triassic-Jurassic.

A aquesta epòca, un asteroïde d’un quilomètre e mièg de diamètre percutiguèt la Tèrra a una velocitat d’aperaquí vint quilomètres per segonda, al luòc-dit de la Judiá, dins la comuna de Pressinhac en Charenta. Laissèt un cratèr d’al mens 21 kilomètres de diamètre, e estralhèt tot a mai de 100 quilomètres a l'entorn. D'ejeccions tombèron a mai de 450 quilomètres d'aquí. L’impacte modifiquèt tanben las ròcas del sos-sòl sus mai de 5 quilomètres de prigondor.

Dempuèi, l’erosion a completement escafat tota traça dins lo relèu e sol lo leugièr bestorn de Vinhana cap al sud dins la comuna de Chassanom li podriá èstre atribuït. Per contre, lo sos-sòl conserva nombrosas ròcas fracturadas, fondudas, remenadas, que sonam de bèrcas. Aquelas ròcas particularas foguèron utilizadas per la basteson dels monuments galloromans, coma los tèrmes de Chassanom, tant coma per d'abitacions e monuments dins tota la region.