Myst
Myst es un videojuec sortit en 1994. Foguèt imaginat per lei fraires Robyn e Rand Miller, desvolopat per Cyan, Inc. e edidat per Brøderbund. Es un juec d'aventura de premiera persona onte lo jogaire incarna « l'Estrangier », un individú teleportat dins l'illa de Myst gràcias a un libre magic. Dèu explorar aqueu mond desconegut, trobar d'autrei libres permetent de se teleportar vèrs d'autreis univèrs e resòuvre l'enigma pausada per dos fraires sarrats dins de libres magics. Lo juec a quatre fin diferentas en foncion dei chausidas realizadas per lo jogaire dins lo corrent de la partida.
A sa sortida, Myst aguèt un succès fòrça important (sièis milions d'unitats vendudas) e recebèt un acuèlh fòrça favorable de part de la premsa especializada[1] [2]. Aqueu succès permetèt de desvolopar quatre seguidas (Riven, Myst III: Exile, Myst IV: Revelation e Myst V: End of Ages) que totalizèron uech milions d'unitats vendudas suplementàrias. De mai, lo sistèma de juec de Myst marquèt una evolucion tant importanta dins l'istòria dau videojuec que s'inventèt l'expression lo genre Myst-Like per designar lei juecs d'aventura basats sus de principis similars.