Kuehneromyces mutabilis
.png)
La foliòta cambiadissa, Kuehneromyces mutabilis en latin, (var. alomèra, aubarata, bidaleta, biulerata, budanha e butanha[1]) es un bolet dau genre Kuehneromyces de la familha dei Strophariaceae.
Es un bolet gregari amb un capèu poput convèx que tend a s'espandir tot en gardant un mamèu centrau. Es jaunàs e pus sorn vèrs lo centre. Se fendascla durant lei periòdes eissuchs mai pòu venir lusent se lei condicions meteorologicas son umidas. Lei lamellas son jaunassas mai viran pauc a pauc vèrs lo brun rolh. Leis espòras son de color brun ferruginós. Lo pè es alongat e sinuós. Pòrta un anèu sorn, fragil e fugidís. Sa partida superiora es jauna e sa partida inferiora es eiriçada de flòcs escaumós bruns.
Comestible excellent, aquela foliòta a una carn blancassa que vèn pus sorna vèrs la basa dau pè. A una sabor doça mai es conselhat de gardar unicament lei capèus deis especimens joves. Se tròba principalament sus lei socas dei fuelhuts, especialament lei faus, onte fòrma de metas de la prima au començament de l'ivèrn. Pasmens, pòu de còps venir sus de conifèrs.
Lo risc de confusion pus grèu es amb Galerina marginata qu'es un bolet mortau que creis sus lei socas de conifèrs.