Jardin de las Plantas (Tolosa)

Lo Jardin de las Plantas de Tolosa es un jardin public, ancian jardin botanic que amb lo Bolingrin e lo Jardin Reial, fa partida d'un ensemble de tres jardins situats au sud-èst del centre de la vila.

S'espandís sus sèt ectaras entre l'andana Jules Guesde, l'andana Frederic Mistral, la carrièra Alfred Duméril e la carrièra Lamarck.

Istòria

Lo premièr Jardin de las Plantas de Tolosa foguèt creat en 1730 per la Societat de las Sciéncias de Tolosa. Mas èra pas al luòc actual; se situava dins lo quartièr de Sant Sarnin, prèp de la pòrta Matabuòu.

La qualitat del sol essent pas pro bona, la colleccion se deguèt desplaçar en 1756 prèp de la carrièra de la Senescauciá (carrièra de las Flors d'uèi).

Aquel jardin èra pas encara dins l'encastre ideal: tròp pichon, enrodat de parets, eca. Foguèt en 1794 per la volontat de Filip Picòt de La Peirosa, naturalista, que los Capitols decidiguèron que lo Jardin de las Plantas seriá situat dins l'encastre gaireben identic a aquel qu'ocupa uèi. Se situa sus una partida de l'ancian claus dels Carmes. Amb una colleccion de 1 300 espècias, localas o en aclimatacion, lo Jardin de las Plantas venguèt un grand Jardin Botanic mas tanben un luòc ont los mai paures podián culhir de plantas medicinalas.

Per decrèt del 27 de julhet de 1808, Napoleon donèt a la vila los terrens e los bastiments del jardin (amb doncas lo cabinet d'istòria naturala).

Pendent la batalha de Tolosa (abril de 1814), lo jardin foguèt utilizat coma punt d'artilhariá dempuèi un de sos taps.

En 1817 foguèt creada una pèça d'aiga, alimentada pel canal de la doas mars escavat a costat.

Puèi lo perimètre del Jardin foguèt leugièrament modificat: s'espandiguèt fins a la Granda Andana (ièu andana Frederic Mistral) mas perdèt de superfícia vèrs l'andana Jules Guesde quand se bastiguèt la Facultat de Medecina (1885).

Lo jardin foguèt transformat a l'ocasion de l'Exposicion Internacionala de 1887: venguèt alara un jardin public.

Actualament

Lo Jardin de las Plantas se tròba al sud-èst del centre vila, dins lo quartièr del Busca e prèp del quartièr de las Domaisèlas ribejant lo Canal de las Doas Mars.

Quand foguèt desplaçat al luòc actual èra fòra dels barris, uèi es al centre dins une zona fòrça abitatada mesclant de construccions ancianas (Carrièra Ozenne, Andana J. Guesde) e los immòbles pus recents (Pòrt de Sant Salvador).

Es desservit per

Las linhas de bus 1|2|10|78|80
Lo mètro: l'estacion "Palais de Justícia" de la linha B es a cinc minutas.
Lo tram: la linha T1 a son cap de linha sus las andanas Jules Guesde près de l'estacion de la linha B "Palais de Justícia.

Es bordat per l'Escòla de Medecina, lo Museum d'Istòria Naturala, lo teatre Daniel Sorano e la glèisa de Sant Exupèri.

Una planca de metal permet als pedons de jónher lo Bolingrin alara que son separats per una avenguda.

Dins lo jardin se pòt veire d'ancians bastiments o rèstas. Lo bastiment del Museum, per exemple, data de la fin del sègle XVI. La pòrta de dintrada èst del jardin es une reconstitucion de 1886 d'una de las pòrtas de l'ancian Capitòli. La pòrta Nòrd se dobrissent sus la carrièra Ozenne foguèt dessenhada per Virebent e la decision de sa construccion data de 15 ventòse de l'an XIII.

Pasmens se abans se podiá veire de fòcs, orses, monins, eca, fins a 1976, se tròba uèi pas que de polas d'aiga, guits, aucas o pavons