Abrivada
L'abrivada (abrivado en nòrma mistralenca) es la pratica gardiana de la conducha dei buòus despuei lei pasquiers fins ais arenas de corsa de taur. La bandida es lo procès au revès, deis arenas fins ai pasquiers.
Encuei, amb lo desenvolopament dau transpòrt de buòus per de carris motorizats, l'abrivada e la bandida s'arrèstan generalament ai pòrtas dei vilas taurinas, sus un percors definit a l'avança e aquelei tèrmes designan la tradicion taurina que en Provença e en Lengadòc consistís en una simulacion d'aquelei operacions per lei carrieras dei vilas o vilatges. Per faire lo trajècte sens incident, lei buòus son encadrats per una desena de gardians dispausats segon una formacion en V.
Durant lei traversadas de vilatges, lei joines abitants nomenats "atrapaires" ensajan de faire escapar lei bèstias. Per fin d'empachar lei taures de s'escapar, lei gardians lor fan traversar lo vilatge au galòp, a la velocitat pus granda possibla.
Leis abrivadas son generalament organizadas especialament durant lei fèstas votivas dins lei vilas e vilatges dei Bocas de Ròse, de Vauclusa, Gard e d’Erau, ont lei carrieras son barradas per l'ocasion.