Tipe 89 I-Go
Lo Tipe 89 I-Go es un carri leugier d'infantariá japonés utilizat durant leis ans 1930-1940. Desvolopat a partir de 1928, èra equipat d'un canon cort de 57 mm e de doas mitralhièras de 6,5 mm. Son blindatge aviá una espessor de 6 a 17 mm. Aquela proteccion èra sufisenta cóntra l'armada chinesa, mai limitada còntra la màger part dei projectils anticarri dau periòde. La velocitat èra tanben un pauc febla. 404 exemplaris foguèron produchs.
Lo tipe 89 I-Go intrèt en servici en 1932. Foguèt ben acuelhit en despiech de problemas de fisabilitat que foguèron pauc a cha pauc reglats. Participèt ai combats en China onte prenguèt aisament l'avantatge còntra lei blindats chinés qu'èran pus ancians e mens ben armats. Foguèt tanben eficaç per destrurre lei posicions fortificadas gràcias a la poissança de son canon. Pasmens, aguèt mai de dificultats durant lei combats frontaliers de 1939 còntra lei Sovietics. Puei, lei Tipe 89 foguèron utilizats durant leis operacions en Asia dau Sud-Èst, mai foguèron largament dominats per lei M4 Sherman estatsunidencs. Lei Japonés lei retirèron deis unitats de premiera linha en 1942. Lei veïculs subrevivents foguèron donats a d'unitats encargadas de luchar cóntra de guerilhas ò transformats en defensa estatica.