Jornada Internacionala dei Femnas
La Jornada Internacionala dei Femnas ò Jornada Internacionala dei Drechs dei Femnas es una jornada internacionala celebrada lo 8 de març. Fa partida dei 87 jornadas internacionalas que son reconegudas per l'ONU.
A l'origina, èra una fèsta socialista creada en 1921 a l'iniciativa de Lenin en onor dei femnas qu'avián iniciat lei premierei manifestacions còntra lo regime imperiau rus lo 8 de març de 1917. Après la Segonda Guèrra Mondiala, s'estendèt ai país dau Blòt de l'Èst e l'ONU adoptèt en 1977 una resolucion demandant a sei membres d'organizar una « Jornada dei Nacions Unidas per lei Drechs de la Femna e la Patz Internacionala ». Aquò favorizèt la difusion de la jornada qu'es a l'ora d'ara celebrada per la màger part deis estats actuaus. Dins lei país comunistas ò èx-comunistas, es tanben sovent un jorn feriat.
Son objectiu es generalament de promòure lei drechs dei femnas e es una jornada d'accion importantas per lei movements feministas ò de celebrar lei cumpliments economics, politics ò sociaus dei femnas. Pasmens, dins certanei país, aquel aspèct politic a disparegut au profiech d'una jornada qu'es venguda per leis òmes una ocasion d'exprimir son amor per lei femnas d'un biais similar a la Sant Valentin.