Witold Gombrowicz

Un article de Wikipèdia, l'enciclopèdia liura.
Anar a : navigacion, Recercar
Bust de Witold Gombrowicz

Witold Gombrowicz (Małoszyce, 4 d'agost de 1904 - Vença, 24 de julh de 1969) foguèt un romancièr e dramaturg polonés del sègle XX. A mai se venguèt famós sonque cap a la fin de sa vida, es considerat actualament coma un dels escrivans màgers de la literatura polonesa.

Biografia[modificar | modificar la font]

Witold Gombrowicz nasquèt en 1904 a Małoszyce, un vilatge del centre-sud de Polonha, al sen d'una familha amonedada qu'aparteniá a la noblesa polonesa. Èra lo mai jove dels quatre enfants de Jan e Antonina Gombrowicz (nascuda Kotkowska). En 1911 la familha partiguèt s'installar a Varsòvia. Estudièt lo drech a l'Universitat de Varsòvia de 1926 a 1932. Aprèp l'autor passèt una annada a París e i estudièt a l'Institut des Hautes Etudes Internationales. A mai se s'interessèt mens als estudis qu'anteriorament lo periòde passat en França li permetèt de conéisser divèrses joves intellectuals. Durant aquel temps visitèt tanben l'airal mediterranèu.

Quand tornèt en Polonha se presentèt mantun còp a de plaças de jurista mas sens i capitar gaire.

La publicacion de Ferdydurke, son primièr roman, li portèt fama e apreciacion dins los cèrcles literaris.

Tot bèl just quand comencèt la Segonda Guèrra Mondiala, Gombrowicz se trobava sul Chrobry, un vaissèl de crosièra que fasiá son viatge inaugural cap a l'America Latina. Quand s'assabentèt que la guèrra aviá esclatat en Euròpa, decidiguèt d'esperar a Buenos Aires que lo conflicte s'acabèsse. Encara que declarèt sa preséncia a las autoritats polonesas d'Argentina en 1941, foguèt pas considerat capable de venir soldat. Gombrowicz demorèt en Argentina fins a 1963 e fòrça sovent aguèt de patir, mai agudament durant la guèrra, d'una granda miséria financièra.