Tsuica

Un article de Wikipèdia, l'enciclopèdia liura.
(Redirigit dempuèi Tsuika)

La tsuica (en romanes țuică) es una bevenda alcolizada romanesa tradicionala qu'es obtenguda per la fermentacion puei la destillacion de prunas. Tira generalament entre 30 e 40% d'alcòl.

Fabricacion[modificar | Modificar lo còdi]

La produccion a luòc tradicionalament entre lo començament de setembre e la fin de decembre[1]. Lei fruchs son mes a fermentar pendent sièis o uech setmanas dins de gròssei tinas dichas butoaie ou căldări[2]. Un alambic en laton, dich cazan[2], es utilizat per la destillacion. Abituament, lei fruchs son de prunas, mai de cerieisas, d'aubricòts o de persègues pòdon tanben èsser utilizats.

A la fin de la destillacion, se recupèra tres fraccions principalas :

  • La tsuica fòrta (țuică de-a-ntâia en romanés) representa quasi 25% dau produch de la distillacion. Son gra d'alcòl es situat entre 45 e 55°. Normalament, es destillada un segond còp e sembla adonc a la Palinca.
  • La tsuica normala (țuică de-a doua), amb un gra entre 30° e 40°, es la tsuica pus consumada e representa la mitat de la produccion de la destillacion.
  • La tsuica febla (țuică de-a treia o apă de țuică) es la darriera fraccion amb un gra d'alcòl entre 5 e 15°.

La tsuica destinada per la consumacion immediata es dicha tsuica fresca (țuică proaspătă) e aquela qu'es entrepausada tsuica vièlha (țuică bătrână). Lo vielhiment dura generalament entre sièis mes e dètz ans[1]. Pasmens, lo gra d'alcòl a evolucionat durant lo sègle XX. D'efèct, en 1900, per l'Exposicion Universala de Paris, lei tsuicas presentadas afichavan entre 15,3° e 31,8°[1].

Produccion[modificar | Modificar lo còdi]

A la fin dau sègle XIX, 55 280 ha èran cultivadas ambé de prunieras[1]. La produccion totala èra adonc de 385 000 hL en Valaquia e de 35 900 hL en Moldàvia. En 2003, la produccion de tsuica èra totjorn una activitat frequenta ambé 140 000 productors[2]. Quasi 41 000 ha d'aubres èran cultivadas per la produccion[1].

Pasmens, dempuei l'intrada de Romania dins l'Union Europèa en 2007, una legislacion novèla es en vigor. Lei productors devon se declarar e metre lo materiau ai nòrmas, en particular ambé la crompa d'alambic en inox o en coire alimentari[2]. De mai, una taxacion relativament importanta es apareguda : 750 € per ectolitre d'alcòl per lei produchs destinats a la comercializacion e 325 € per la produccion destinada a l'autoconsumacion[2]. Lei pichons productors son donc obligats d'arrestar o de contuniar dins l'illegalitat[2]. En revenge, la filiera comerciala e industriala se deu estructurar[2]. Ansin, lo tractat d'adesion de Romania a l'Union Europèa reconois e para sièis tsuicas e de productors assaian d'obtenir de AOC per sei produchs[2].

Consumacion[modificar | Modificar lo còdi]

Tradicionalament, un veire de tsuica es ofèrt per faire la benvenguda o portar un brinde[2]. Pòt sovent èsser acompanhada per de fromatge e de pomas d'amor[2]. D'ivèrn, se pòt tanben beure cauda e relevada d'espècias[2]. Generalament, la tsuica se retròba per leis eveniments urós o malurós coma lei maridatges, lei batejats, lei funeralhas... etc[2].

Nòtas e referéncias[modificar | Modificar lo còdi]

  1. 1,0 1,1 1,2 1,3 et 1,4 D. Beceanu, N. Niculaua, A comparative study of an assortment of plum distilled drinks, made in Romania, Cercetări Agronomice în Moldova, Vol. XLII , No. 3 (139) / 2009.
  2. 2,00 2,01 2,02 2,03 2,04 2,05 2,06 2,07 2,08 2,09 2,10 et 2,11 Thibaut Lespagnol e Adriana Obreja, Roumanie : la tuica, victime collatérale de l'élargissement ?, Regard vers l'Est, 1èr de julhet de 2008, [1]