Tractat de Simulambuco

Lo tractat de Simulambuco qu'estó signat en 1885 peus representants deu Reiaume de Portugau e las autoritats africanas locaus deu Ngoyo, petit reiaume situat au sud de Cabinda. Que compren 11 articles qui plaçan lo reiaume african devath protectorat portugués.

Carta d'Africa en 1880, abans la conferenci de Berlin.

Lo prumèr article estipula que «los princes e autes caps e los lors successors que declaran, volontàriament reconéisher la sobeiranetat de Portugau, plaçant devath lo protectorat d'aquera nacion tots los territòris qui govèrnan».

Aqueth tractat qu'intervienó pendent lo cicle de la conferéncia de Berlin qui va abotir a un acòrd entau partatge d'Africa enter las diferentas nacions europèas.

Lo tractat que hè seguida a dus autes tractats mei locaus: lo tractat de Chifuma, signat en 29 de seteme de 1883 dab lo rei deu Cacongo, e lo tractat de Chicamba, signat lo 26 de deceme de 1884 dab divers caps de Cabinda.

Lo tractat qu'estó signat per Guillerme Augusto de Brito Capello, capitan lòctenent de l'Armada portuguesa, comandant de la corveta Rainha de Portugal. La possession de Cabinda que serà confirmat aus portugués e lo territòri que constituïrà alavetz ua exclava de l'Angòla portuguesa.

Dessenh umoristic representant Léopold II partatjant Còngo.

Cabinda qu'ei estada integrada a l'Empèri portugués quan lo rei deus Bèlgas, Leopold II, demandè a Lisbona un accès a l'ocean Atlantic entau son Estat independent de Còngo. Portugau que cedí alavetz ua porcion deu nòrd d'Angòla, separant durablament Cabinda de la rèsta deu territòri angolés.

En 2005, las autoritats locaus de Cabinda que celebrèn de faiçon provocaira lo 120au anniversari d'aqueth acòrd, suscitant la colèra deu govèrn angolés, qui considèra qu'aqueth tractat remet pas en causea la soa sobeiranetat sus l'enclava.