Tractat de Francfòrt
Lo Tractat de Francfòrt, es lo tractat de patz signat entre França e Prússia lo 10 de mai de 1871, que , metèt fin oficialament a la guèrra de 1870. Las negociacions foguèron entamenadas, a Versalhas, per Adòlf Tiers e Jules Favre tre lo 23 de febrièr amb lo cancelièr imperial Otto von Bismarck. Abotiguèron lo 26 de febrièr a la signatura dels preliminaris a Versalhas. Las discussions contunhèron a Brussèlas, puèi a Francfòrt.
Las condicions impausadas per Bismarck prevesián l'annexion per l'Empèri alemand d'Alsàcia e d'una partida de Lorena qu'avián autrecòps apertengut al Sant Empèri Roman Germanic e lo pagament d'una indemnitat de guèrra de cinc miliards de francs-or de versar en tres ans.
Foguèron annexats :
- En Alsàcia : los departaments del Bas Ren e del Naut Ren levat l'arrondiment de Belfòrt ;
- En Mosèla : los arrondiments de Sarreguemines, Metz, Thionville e 11 comunas de l'arrondiment de Briey, especialament aquelas ont se debanèron de batalhas (Saint-Privat-la-Montagne) ;
- En Meurthe : los arrondiments de Sarrebourg (mens 9 comunas) e Château-Salins ;
- Dins los Vòges : los cantons de Saales e Schirmeck.
La França perdiguèt 14 470 quilomètres carats, 1694 comunas e 1597000 abitants. Lo territòri cedit compreniá 20 % del potencial minièr e siderurgic francés, e la ligason per canals entre lo canal de l'Èst e lo canal de Ròse a Ren.