Vejatz lo contengut

Single

Un article de Wikipèdia, l'enciclopèdia liura.
Lo simple « promocional » (45 torns) de Another Brick in the Wall (part 2) dels Britanics de Pink Floyd, uèi la cançon mai coneguda del grop, sortit en 1979 quinze jorns abans la de l'album The Wall. En fàcia B, un títol « menor » : One of My Turns.
Lo simple (CD single dos títols) Big Gun (1993) del grop australian AC/DC.

Un simple, o un single en anglés (un senzill en catalan), es un supòrt musical contenent en general doas cançons relativament cortas (en general mens de dètz minutas). En Occitània, lo CD single dos títols (disc compact) a succedit dins lo comèrci de caps 1992 al disc vinil 45 torns. Lo simple es generalament en rapòrt ambe un album ja sortit, o qu'es a mand de l'èsser. Sa vocacion es donc dins aqueste cas d'atirar l'atencion sul dich album gràcias a l'atractivitat de la cançon causida per i figurar (simple « promocional »).

Aital, un single conten lo mai sovent un tròç màger en « fàcia A » (en « pista 1 » pel CD), sovent acompanhat d'un tròç supausat menor en « fàcia B » (en « pista 2 » pel CD). La « fàcia B » pòt èsser tanben simplament una version instrumentala o ambe un adobament diferent de la cançon de la « fàcia A ». Pòt arribar pasmens la suspresa qu'un tròç « fàcia B » aja mai de capitada que la « fàcia A ». Per exemple, lo tube J'ai demandé à la Lune d'Indochine èra al debut sonque la pista 2 d'un CD single dos títols qu'aviá per pista 1 la cançon Punker.

Quand la « fàcia B » pels 45 torns ( « pista 2 », quitament « pista 3 » pel CD single) es pas una version alternativa de la « fàcia A », es alavetz quasi tostemps una autra cançon de l'artista, una cançon presenta sus l'album en rapòrt, o mai rarament una cançon tirada d'un album precedent (per exemple, Dans la rue de Michel Polnareff, cançon tirada de l'album Incognito, figura en « fàcia B » de la « fàcia A » Toi et moi de l'album Kâmâ Sutrâ ; o encara Kosciusko, tròç tirat de l'album Red Sails in the Sunset de Midnight Oil, « fàcia B » de The Dead Heart de l'album Diesel and Dust, la « fàcia A » del 45 torns). La « fàcia B » pòt èsser tanben un enregistrament inedit, sovent un tròç jutjat « anecdotic » o tròp menor per figurar sus l'album (per exemple : In Paris, un ensaj de tròç inedit en anglés del grop francés Téléphone, publicat en « fàcia B » de New-York avec toi).

Dempuèi las annadas 1970, los enregistraments contenent mai de dos títols per fàcia (pels 45 torns) o mai de tres pistas (pels CD) son pas considerats coma de singles mas coma d'EP, es a díser un Extended play (un prolongat en occitan) : dins aqueste cas se parla pulèu jà de mini album. Pasmens, dins las annadas 1960, los 45 torns avián quasi totjorn dos títols en « fàcia A » e dos autres en « fàcia B ».

La màger part dels 45 torns son compausats de dos títols ierarquizats, una cançon principala en « fàcia A » e una menora en « fàcia B » ; mas d'unes 45 torns se presentan jos forma de « doble fàcia A ». Per exemple, lo 45 torns Strawberry Fields Forever / Penny Lane del grop anglés Los Beatles : aqueles dos tròces figurant de còsta dins lo títol del single. Es un pauc çò meteis pel 45 torns 3ème sexe / 3 nuits par semaine del grop francés Indochine, los dos títols son al meteis nivel sus la pocheta, quitament se en realitat 3 nuits par semaine es la « fàcia B ».

Los simples prepausan sovent una « version ràdio » de la cançon, dicha « version single », diferenta de la « version originala » de l'album. Aital, la cançon pòt èsser modificada per aver una durada mai adaptada (mai corta) a un passatge en ràdio, çò qu'es lo cas per exemple de la version 45 torns de New years day del grop irlandés U2, d'una durada de 3'40, mentre que la version album ela dura 5'36.

D'autra part, los adobaments pòdon èsser tan plan remanejats per passar a la ràdio o en discotèca se la version album es pressentida coma inadaptada per aquò : l'idèa es alavetz de pas traïr la creacion artistica del tròç original de l'album, mas d'esplechar lo potencial popular del dich tròç ambe un adobament single mai atractiu. Aital, las versions 45 torns de Des fleurs pour Salinger, de 3ème sexe / 3 nuits par semaine d'Indochine son fòrça diferentas de lors versions originalas sus l'album.