Salhent (tactica militara)
Un salhent es una porcion de territòri contrarotlat per una fòrça armada que s'avança en formant una poncha dins lo dispositiu enemic. Sus una carta, aparéis generalament coma una avançada parcialament enviroutada per de linhas enemigas. La formacion d'una tala estructura pòu aver de causas multiplas coma d'atacas sus leis alas d'un ponch defensiu tròp fòrt, una ataca frontala qu'enfonsa una partida de la defensa advèrsa ò de manòbras d'un defensor desirós d'atraire l'assalhidor dins un endrech particular (per exemple, per i organizar una emboscada).
Un salhant a quauqueis avantatges per son possessor. Pòu li permetre de preparar una ataca còntra la prefondor dau dispositiu advèrs, menaçar plusors direccions d'un biais simultanèu e complicar lei comunicacions de l'adversari. Pasmens, un salhent es mai que mai considerat coma una fònt de riscs per son possessor. D'efiech, se permet de menaçar la logistica enemiga, son avitalhament es sovent malaisat car lo nombre de rotas d'accès es limitat. De mai, lei flancs dau salhent son fòrça expausats ais atacas car l'afondrament d'un dei flancs pòu permetre l'enceuclament e la destruccion deis unitats encargadas de tenir l'endrech.
Dins l'istòria militara, fòrça batalhas son ansin lo resultat d'atacas dirigidas còntra de salhents. Lo salhent d'Ypres, la batalha de Verdun ò la batalha de Korsk ne'n son d'exemples famós.