Sètge de Marselha (49 avC)
Lo sètge de Marselha de 49 avC es un episòdi de la guèrra civila de Cesar. Opausèt una armada comandada per Juli Cesar (15 000 òmes) ai defensors de la vila menats per Luci Domiti Ahenobarbi (8 000 òmes). La batalha foguèt la consequéncia dau refús dei Massaliòtas de sostenir lo partit de Cesar. Sei defensas terrèstras resistiguèron, mai après doas victòrias navalas, la flòta de Cesar poguèt blocar l'accès au pòrt de la vila. Aquò entraïnèt una famina que menèt a la capitulacion dei defensors. Lei vencuts foguèron relativament ben tractats e Massalia gardèt una certana autonòmia au sen de l'espaci roman. Pasmens, perdiguèt de territòris importants en Provença e son influéncia politica foguèt largament reducha au profiech d'Arle.