Revòuta dei Cascavèus

Aqueste article es redigit en provençau.
Un article de Wikipèdia, l'enciclopèdia liura.

La Revòuta dei Cascavèus es una insureccion populara provençala que se debanèt en 1630 per s'opausar a un projècte de reforma de l'administracion fiscala reiala decidit per lo cardenau de Richelieu. Lo tèrme « cascavèu » remanda au simbòl d'identificacion utilizat per leis insurgents.

En 1630, Ais de Provença èra estada tocada per una importanta epidemia de pèsta. Dins aqueu contèxte, la promulgacion per Richelieu de l'Edicte deis Elegits, un edicte de centralizacion que prevesiá de transferir a de delegats reiaus lo poder tengut per lo Parlament d'Ais en matèria de collècta e de reparticion deis impòsts, entraïnèt lo maucontentament de la màger part dei parlamentaris e de la noblesa provençala. Leis elèits locaus sostenguèron donc l'insureccion de la populacion d'Ais que crenhava una importanta inflacion. Lo movement se desvolopèt alora e lo Parlament d'Ais refusèt d'enregistrar l'Edicte deis Elegits.

Lo movement popular se transformèt rapidament en insureccion còntra totei leis elèits. Lo castèu de la Barbent e plusors bastidas foguèron cremats per leis insurgents. Leis oficiers reiaus encargats de transferir la Cort dei Còmptes d'Ais a Tolon foguèron egalament atacats. Per restablir l'òrdre, Richelieu mandèt una armada de 6 000 òmes comandada per Enric II de Borbon-Condé. En parallèl, la noblesa provençala abandonèt lo movement, espaurida per lei destruccions. Lei fòrças reialas poguèron donc prendre lo contraròtle de la vila sensa dificultat. Richelieu abandonèt son projècte mai, en cambi, lo Parlament d'Ais foguèt somés a una emenda considerabla de 1,5 milions de liuras.

Liames intèrnes[modificar | Modificar lo còdi]

Bibliografia[modificar | Modificar lo còdi]

  • (fr) Henri Grégoire, « Les impôts en Provence avant la Révolution », Bulletin de l'Académie Du Var, vol. 50-51, 1882, pp. 82-84.

Nòtas e referéncias[modificar | Modificar lo còdi]