Prambanan
Prambanan es un ensembe de 240 temples shivaïtas bastits durant lo segle IX per la dinastia Sanajaya dau prumier reiaume de Mataram dins las regions centralas de Java. Una inscripcion dataa de 856 poiriá marcar l'annaa de la fondacion dau site. Abandonat dins lo corrent dau segle X, l'endrech foguèc pas oblidat per las populacions localas, mas suscitèc pauc d'interès fins a l'arribaa dels Europeus a partir dau segle XVIII. L'estudi vertadier dels vestigis comencèc a la fin dau segle XIX e una prumiera restauracion foguèt decidia en 1918 per las autoritats neerlandesas. Los trabalhs contunhèron après l'independéncia d'Indonesia e lo site foguèc classat au Patrimòni Mondiau de l'Umanitat de l'UNESCO en 1991. En despiech de las destruccions engendraas per los pilhards durant lo periòde d'abandon, los vestigis demòran impressionants e Prambanan es vengut un luòc toristic important.