Ofra Haza
.jpg)
Bat-Sheva Ofra Haza, o mai simplament Ofra Haza (עפרה חזה), nascuda lo 19 de novembre de 1957 a Tel Aviv e mòrta lo 23 de febrièr de 2000 a Ramat Gant (Israèl), èra una actritz e cantaira israeliana, originària del Iemèn.
A 19 ans, es devenguda una cantaira populara en Israèl.
Es designada coma representanta d'Israèl pel concors Eurovision de l'annada 1983, ont empòrta la segonda plaça ambe sa cançon Chai.
Aquel succès dinamiza sa reconeissença musicala en Israèl mas permet tanben d'espandir sa notorietat a l'estrangièr. A partir de 1985, ambe l'album Yemenite Songs, adòpta un estili musical mesclant la musica tradicionala, los cants religioses (tèxtes del rabin Shalom Shabazi del sègle XVII) e la musica pop occidentala. Aital, son títol Im Nin'alu, mesclant de paraulas en anglés e en ebrèu, ven en 1988 un tube internacional.
En seguida a collaborat ambe mantuns artistas de la scèna pop occidentala, per exemple un escapolon de sa votz es estat utilizat en 1987 dins lo tròç Paid in Full del duò american de hip-hop Eric B. & Rakim.
En 1992, pausa sa votz sus una version novèla del celèbre títol Temple of Love del grop britanic de ròck gotic The Sisters of Mercy. La meteissa annada, canta en duò ambe Iggy Pop (Daw Da Hiya). A tanben participat als còrs sus la cançon My Love Is for Real de la cantaira americana Paula Abdul.