Lança-roquetas multiple

Un article de Wikipèdia, l'enciclopèdia liura.
Fotografia d'una batariá de lança-roquetas multiple sovietic BM-21 Grad en 1989.

Lo lança-roquetas multiple ò LRM es un sistèma d'arma constituit d'una batariá de lança-roquetas montada sus un quadre de carri, de camion ò de naviri. Lei roquetas tiradas an una trajectòria balistica e una portada de plusors quilomètres. Per aquò, lei lança-roquetas multiples son integrats dins l'artilhariá.

Una forma arcaïca de lança-roquetas multiple es mencionada en Corèa en 1377. Inventat per lo generau e sabent Choi Mu-seon (1325-1395), èra compausat d'un carriòt capable de tirar plusors fusadas d'un biais simultanèu. En 1835, la maquina infernala de Giuseppe Fieschi (1790-1836) èra tanben facha de plusors canons parallèls. Pasmens, lo premier lança-roquetas multiple modèrne es una invencion sovietica. Es lo famós Katyusha que foguèt fòrça utilizat durant la Segonda Guèrra Mondiala per l'Armada Roja. Capables de tirar entre 14 e 48 roquetas a una distància de 8 km, aquelei veïculs permetèron de validar lo concèpte que foguèt pauc a pauc adoptat per leis autreis armadas modèrnas (Nebelwerfer alemand, T34 Calliope estatsunidenc...).

Durant la Guèrra Freja, lei recèrcas contunièron per desvolopar de sistèmas pus sofisticats. Intrat en servici en 1983, lo M270 estatsunidenc marquèt una revolucion dins lo domeni. D'efiech, una batariá de 9 veïculs d'aqueu tipe pòu tirar 108 roquetas guidadas portant 69 000 grenadas en una minuta. Aquò permet de neutralizar 700 ectaras e a d'efiechs quasi identics a una arma nucleara tactica. Per la seguida, leis autrei país, especialament l'URSS, desvolopèron d'armas similaras coma lo BM-30 Smerch.

Liames intèrnes[modificar | Modificar lo còdi]

Bibliografia[modificar | Modificar lo còdi]

Nòtas e referéncias[modificar | Modificar lo còdi]