Jürgen Habermas
Jürgen Habermas (18 de junh de 1929, Düsseldorf - 14 de març de 2026, Starnberg) es un filosòf e sociològ alemand de la segonda mitat dau sègle XX e de la premiera partida dau sègle XXI. Prepausèt una filosofia centrada sus lo dialòg, la rason e la participacion ciutadana destinada a reconciliar modernitat e democracia en mostrant que la comunicacion liura e argumentada es lo fondament d'una societat justa.
Sa pensada s'organiza a l'entorn de la nocion centrala de comunicacion. Dins son òbra pus famosa, Teoria de l'Agir Comunicacionau (1981), destria doas formas d'accion que l'agir estrategic, orientat vèrs lo succès personau, e l'agir comunicacionau, fondat sus lo dialòg e la recèrca d'un acòrdi racionau entre individús. Considèra ansin que la racionalitat se limita pas a la sciéncia ò a la tecnica, mai que se manifèsta tanben en la capacitat deis èssers umans de discutir liurament per arribar a un consensus. Desvolopèt egalament lo concèpte d'espaci public, definit coma un luòc de debat onte lei ciutadans pòdon escambiar d'arguments d'un biais critic e dins L'Espaci Public publicat en 1962, mostrèt coma la transformacion d'aquel espaci per lei mèdias e l'elèit economic menaça lo bòn foncionament de la democracia.
Habermas èra fòrça engatjat en politica. I defendiguèt una vision en rapòrt amb sa filosofia. Favorable a la democracia, a la construccion europèa e a la promoccion dei drechs de l'Òme, èra partisan d'una democracia deliberativa fondada sus decisions presas a partir de discussions racionalas e inclusivas menadas per lei ciutadans.