IG Farben
IG Farben, abreviacion de l'alemand InteressenGemeinschaft, èra una companhiá alemanda especializaa dins l'industria quimica. Se formèc en 1925 amb la fusion de plusors companhiás alemandas (BASF, Bayer, Agfa, etc.) e la creacion d'un conseu de gestion comun. Pasmens, chasca entrepresa gardèc una autonomia relativament larja. L'ensemble formava un important conglomerat productor d'amoniac sintetic, de biocidas, d'esséncia sintetica, de medicaments, de colorants, de plastics e de textiles.
Durant la Segonda Guerra Mondiala, IG Farben aguèc un ròtle centrau dins l'esfòrç de guerra dau IIIen Reich e participèc a l'esplecha dels presoniers dels camps de concentracion alemands. En particular, la companhiá participèc a la construccion dau complexe d'Auschwitz e fabriquèc lo zyklon B utilizat per assassinar las victimas de las chambras de gas. Après la guerra, 13 responsables dau conglomerat foguèron condamnats per trabalh forçat o pilhatge de las regions ocupaas. Puei, en 1952, foguèc decidit de desmantelar lo conglomerat. Per aquò, sos actius foguèron partejats en cinc companhiás independentas (BASF, Bayer, Hoechst, Cassella, Huels).