Highland Clearances

Lo procediment conegut en anglés dab lo nom de Highland Clearances (en gaelic escocés Fuadaich nan Gàidheal, "l'expulsion dels gaelics"), qui's poiré aperar en occitan la "expulsion de las Tèrras Hautas", que consistí en lo desplaçament forçat de la populacion de las Highlands escocesas pendent lo sègle XVIII. Aqueths desplaçaments prengón amplor a partir de las Rebellion Jacobitas de 1708 e de l'Acte de desarmament de 1716, entà culminar après la batalha de Culloden de 1746.

Aqueth desplaçament que provoquè ua migracion massiva cap a las còstas escocesas, las Lowlands, e l'estrangèr. Aqueras eviccions que s'inscriven dens un cambiament generau deu sistèma agricòla deu Reiaume Unit, mes aqueth desplaçament particular, pr'amor de la soa cronologia tardiva, de l'abséncia de proteccion juridica deus bordièrs a tèrmi cort dens lo dret escocés, de la rompedura brutau dab l'ancian sistèma clanic, atau com la brutalitat de nombrosas ordis d'expulsion, que conferí aus Highland Clearances ua notorietat particulara.

Los procediments qui despoblaèn las campanhas anglesas pendent la Revolucion agricòla britanica qu'avèvan començat hòrt mei de d'òra, dens çò qui s'a aperat los Lowland Clearances. Totun, l'impacte suu nòrd d'Escòcia —on lo gaelic escocés èra parlat e on subsistiva ua cultura semi-feudau— que suscitè protèstas e un pregond ressentiment au demiei deus descendents deus qui estón obligats d'emigrar o de subervíver dens los barris urbans o dens de petitas zònas marginaus, transformats en crofters, logataris de minusculas parcèlas, e obligats de tribalhar dens condicions inumanas entaus grans proprietaris fonsièrs.