Hannah Arendt
.jpg)
Hannah Arendt (14 d'octòbre de 1906, Hannover - 4 de decembre de 1975, Nòva York) es una filosòfa e teoriciana politica majora dau segle XX. Naissua dins una familha judieva, estudièc la filosofia amb de professors coma Martin Heidegger (1889-1976) e Karl Jaspers (1883-1969). Deguèc quitar Alemanha en 1933 après l'arribaa dels nazis au poder e sejornèc en França. Puei, emigrèc als Estats Units onte publiquèc la màger part de son òbra intellectuala.
Sos trabalhs s'interessèron principalament a la comprenença dels regimes totalitaris, a la modernitat politica e a la condicion umana. Un de sos libres mai famós es las Originas dau Totalitarisme publicat en 1951. I analizèc lo nazisme e l'estalinisme coma de sistemas noveus fondats sus la terror, l'ideologia e la destruccion de las estructuras tradicionalas. Segon ela, l'isolament dels individús e la disparicion de las basas socialas èran una causa prumiera de la formacion d'aquelos regimes. Puei, Arendt desvolopèc una reflexion originala sus l'accion politica e la libertat. Dins La Condicion de l'Òme Moderne, pareissut en 1958, s'interessèc au trabalh, a l'òbra e a l'accion coma elements permetent als individús d'agir e bastir un monde comun. Valoriza pereu l'espaci public coma luec de debat e de pluralitat. Pasmens, son concepte mai famós es aqueu de la « banalitat dau mau » formulat durant lo procès d'Adolf Eichmann en 1963. Segon aquela teoria, lo mau es comés per d'òmes ordinaris que realizan de crimes orribles d'un biais jornadier. Dins sos textes, presenta ansin Eichmann coma un foncionari ordinari dau Reich.
La pensaa d'Arendt demòra essenciala per estudiar e comprendre las derivas politicas modernas, la responsabilitat individuala e la fragilitat de las democracias, mas es egalament discutia. En particular, sa definicion dau totalitarisme èra fòrça larja e aviá tendéncia a englobar tots los regimes fondats sus lo contentament de las aspiracions de las massas popularas. Aquò es vist coma una oposicion als regimes socialistas en generau. Son estudi d'Eichmann coma simple foncionari es pereu contestaa que son passat e son engatjament nazi fanatic son desenant ben documentats per los istorians.