Guerra de Black Hawk
_(14590318379).jpg)
La Guerra de Black Hawk que se debanèt de mai a aost de 1832 entre los Estats Units e un ensemble de tribús amerindianas menaas per Balck Hawk, un chef sauk. Los Amerindians èran environ 1 100 (500 combatents) e avián per objectiu de se tornar installar dins una region situaa en Illinois. Las tribús seguissent Black Hawk èran compausaas de Sauks, de Meskwakis e de Kickapoos. Foguèron ajudaas durant los combats per de Winnebagos e de Potawatomis.
Las autoritats estatsunidencas considerèron lo grop de Black Hawk coma una fòrça ostila e mobilizèron rapidament de milícias. Amb lo sosten de las unitats regularas en garnison dins la region e l'ajuda de Menominees e de Sioux opausats als Sauks, dispausèron d'a pauc près 7 000 òmes. Menat per lo generau Henry Atkinson, los Estatsunidencs assajèron de trobar lo campament principau de Black Hawk. Pasmens, lo prumier combat important s'achabèt per una victòria amerindiana a Stillman's Run (14 de mai). Aquò permetèt als Amerindians d'organizar d'incursions dins lo territòri estatsunidenc per i atacar los fòrts. Lo colerà decimèt pereu las unitats estatsunidencas engatjaas a la rechercha de Black Hawk. Pasmens, la superioritat numerica de las fòrças d'Atkinson li permetèt de restablir la situacion e de trobar lo campament. L'eissia dau conflicte foguèt alora rapida. Lo 21 de julhet, la batalha de Wisconsin Heights permetèt als Amerindians de s'enfugir, mas 40 a 70 combatents foguèron tuats. Puei, lo resta foguèt interceptat a la batalha de Bad Axe (1èr-2 d'aost) que s'achabèt per la mòrt d'al mens 300 Amerindians. Black Hawk e los chefs principaus capitèron de s'enfugir, mas foguèron capturats ulteriorament.
Ligams internes
[modificar | modificar lo còdi]Bibliografia
[modificar | modificar lo còdi]- (en) Patrick J. Jung, The Black Hawk War of 1832, Norman, University of Oklahoma Press, 2008, 275 p.