Gregòri V

Un article de Wikipèdia, l'enciclopèdia liura.
Salta a la navegació Salta a la cerca
Representacion dau papa Gregòri V e de l'emperaire Oton III.

Gregòri V (973, Stainach - 23 de febrier de 999, Roma) foguèt lo 138en papa de la Glèisa Catolica dau 3 de mai de 996 au 23 de febrier de 999. Succediguèt a Joan XV (985-996) e foguèt remplaçat per Silvèstre II (999-1003).

Cosin de l'emperaire Oton III (983-1002, èra nascut dins una familha aristocratica d'Àustria. Son nom vertadier èra Brunon de Caríntia. Dirigit vèrs una carriera eclesiastica, recebèt una educacion religiosa de part de l'arquevesque Willigis de Maiança e venguèt vicari de la cort imperiala. En 996, quand lo papa Joan XV demandèt d'ajuda a Oton III per restablir son autoritat en Roma, Brunon acompanhèt donc son cosin en Itàlia. Pasmens, Joan XV moriguèt avans l'arribada d'Oton III que designèt Brunon per li succedir. L'eleccion aguèt luòc lo 3 de mai de 996 en preséncia dau pòble e dau clergat roman.

La premiera partida dau pontificat de Gregòri V foguèt marcada per lo coronament de l'emperaire Oton III e per la reünion de dos sinòdes regardant la question de l'esquisme amb la Glèisa d'Orient. Puei, Oton III quitèt la peninsula laissant de fòrças a divèrsei nobles italians cargats de sostenir militarament lo papa. Pasmens, aquò foguèt pas sufisent car un complòt organizat per lo patrician Crescentius lo Jove prenguèt lo contraròtle de Roma en setembre de 996 e elegiguèt un antipapa dich Joan XVI. Gregòri V capitèt de s'enfugir mai deguèt esperar lo retorn d'Oton III per tornar ocupar Roma en febrier de 998. Crescentius foguèt executat e Joan XVI torturat per lei venceires. Dins aquò, Gregòri V aprofichèt gaire aquela victòria car moriguèt un an pus tard probablament en causa dau paludisme.

Liames intèrnes[modificar | modificar la font]

Bibliografia[modificar | modificar la font]

Nòtas e referéncias[modificar | modificar la font]