Franz Conrad von Hötzendorf

Retrach de Franz Conrad von Hötzendorf en 1915.

Franz Conrad von Hötzendorf (11 de novembre de 1852, Penzing - 25 d'aost de 1925, Bad Mergentheim) es un mareschau austrian de la Prumiera Guerra Mondiala. Chef de l'Estat-Major generau de l'armaa austroongresa de 1906 a 1911, èra un partisan de l'intraa en guerra contra Serbia e contra Itàlia per eliminar preventivament d'enemics possibles al sud dau païs. Après un cort periòde de disgràcia en 1912, foguèt charjat de preparar los plans austrians per la Prumiera Guerra Mondiala. Dins aqueu quadre, sostenguèt lo raprochament amb Alemanha e rescontrèt regularament Helmuth von Moltke, son omològ alemand.

Durant la guerra, concentrèt ansin sas fòrças a l'est per permetre als Alemands d'aplicar lo plan Schlieffen. Aquò permetèt als Rus de passar la frontiera austroongresa al nòrd-est, mas la situacion foguèt restablia amb las ofensivas austroalemandas de 1915 que permetèron de conquistar Polonha. Pasmens, sa gestion dau frònt orientau foguèt criticaa en causa dau mantenement de tacticas consideraas coma obsoletas e de l'amplor de las perdas. En 1916, lo succès de l'ofensiva Brussilov menèt a una disgràcia novela. Dinque a la fin dau conflicte, von Hötzendorf ocupèt de comandaments segondaris en Itàlia e los Alemands prenguèron de facto la direccion de l'armaa austroongresa. Pasmens, contunhèt d'ordonar d'atacas regularas sus lo frònt italian e, en causa de las perdas causaas per aquelas atacas, foguèt en partia responsable de la desintegracion de las fòrças austrianas charjadas de tenir lo frònt aupenc en 1918.

Ligams internes

• Prumiera Guerra Mondiala.

Bibliografia

• (fr) Jean-Paul Bled, L'agonie d'une monarchie : Autriche-Hongrie 1914-1920, París, Taillandier, 2014, 464 p.
• (fr) Christopher Munro Clark (trad. Marie-Anne de Béru), Les somnambules : été 1914, comment l'Europe a marché vers la guerre, París, Flammarion, coll. « Au fil de l'histoire », 2013, 668 p.
• (fr) Max Schiavon, L'Autriche-Hongrie dans la Première Guerre mondiale : La fin d'un empire, París, Éditions SOTECA, 14-18 Éditions, coll. « Les Nations dans la Grande Guerre », 2011, 298 p.