Gaston Phébus, Le Lion des Pyrénées

Castèth de Bonaguil, un deus lòcs de viratge

Escut de Gaston Febus

Gaston Phébus, Le Lion des Pyrénées («Gaston Febus, Lo Leon deus Pirenèus») qu'ei ua seria de television de 1978 basada suu roman deu medish nom (purmèr tòme d'ua trilogia) escrivut peu cople Myriam e Gaston de Bearn (aqueth darrèr gessit justament de l'Ostau de Bearn per l'arram de l'Ostau de Galard de Brassac de Bearn, descendent de quauques uns deus protagonistas de l'òbra).

Qu'ei ua coproduccion francobelgosoïssa.

Que ho realizada per Jacques Armand e Bernard Borderie.

Los ròtles principaus que hon interpretats per Jean-Claude Drouot (Gaston Febus), Nicole Garcia (Agnès de Navarra), Pascale Rivault (Myriam) e Claude Gensac (Joana de Borgonha) e, dens un deus sons purmèrs ròtles, Lambert Wilson.

Sinòpsi

Castèth de Fénelon, un deus lòcs de viratge

Castèth de Bainac, causit entà evocar lo castèth de Bètlòc

Gaston Febus, comte de Fois-Bearn qu'ei un deus vassaus màgers deu Rei de França e, mainatge, que jura d'esposar las simpla Myriam, çò que hè adulte. A la Cort, Agnès de Navarra que vad amorosa d'eth e, dab l'ajuda deu son hrair (Carles II de Navarra), que hè emposoar Myriam per un agent de Carles, au mejan d'ua lira emposoada. Aqueth agent qu'ei descobèrt après l'assassinat e près peus òmis deu Comte ; aqueths que'u liuran ad Hannibal, l'ors deu Comte, qui l'executa.

Febus que torna a la Cort dab Hannibal entà començar la soa venjança e espaurugar Carles e Agnés. Aqueths que hèn executar Hannibal e qu'essajan, shens s'i escàder, de har aucíder lo Comte tanben. Après la batalha de Crécy e ua disputa dab Febus, lo Rei de França que cranh la defeccion deu son vassau. Jogant sus aquesta paur, Febus que demòra dens lo camp francés mes que'n prohèita entà obtiénguer la man d'Agnès, qui, molhèr soa, e serà mei aisida de castigar.

A la cort de Febus, Agnès qu'ei efectivament abaishada, e Febus que's pren ua mestressa, Margueritte, qui dauneja a taula devant Agnès.

Partit en crozada en Euròpa deu Nòrd dab los Cavaèrs Teutonics, Febus que torna e qu'a lo parat de sauvar la Daufina e sas daunas miaçadas peus jacques. A la cort, Carles II de Navarra que las se vira entà convéncer lo Regent que lo cavaèrs de Febus que's ajacat dab las hemnas e, en secret, los dus qu'embarran Febus au Casteret de París. Carles que'u miaça de har aucíder se non libera pas Agnès mes lo Comte, au moment qui lo navarrés e's cred de 'laver emposat, que'u se pren e que's las vira entà escapà's.

Castèth de Vincennes, un deus lòcs de viratge

En Bearn, Agnès, convençuda per un cavaèr bastard de l'Ostau de Fois-Bearn qu'a près lo poder com regenta e hèit empresoar Margueritte. Febus la libera e qu'embarra au son torn Agnès.

Corbeyran, oncle bastard de Febus e lo son mentor, que decideish de s'encargar deu duel judiciari mes per trahida qu'ei aucit. Abans de morir que hè jurar a Febus de se desseparar d'Agnès en bèth har trencar lo maridatge e de har deu hilh, Yvain de Margueritte l'eretèr.

Malurosament, près d'un còp de holia, Febus que se'n va au Castèth de Bètlòc on a hèit embarrar Agnès qui demòra dab lo son menestrel Roger de Mahaut, e demorat dètz dias dab èra en crisi de deliri, que s'ajaça dab era e que la hè vàder encinta de Gaston, d'un eretèr legitim donc, çò que la quita Marguerita e vien arreconéisher en bèth denegar los arguments de Febus que lo nenet qu'ei deu menestrel.

Febus qu'expulsa Agnès entà Navarra.

Las annadas que passan e Febus qu'ei regeta Gaston en tot preferir Yvain. Anat véder Agnès après mantuas annadas entà se plànher d'un ensag de Febus de har arreconéisher lo còp de holia entà desprovesir Gaston deus sons drets d'eretèr legitim, Carles e sa sòr que'u dan veren entà emposoar la Cort de Fois-Bearn, mes un can emposoat en purmèr que muisha lo complòt a Febus qui hè embarrar Gaston.

Devath las suplicacions de Marguerita e d'Yvain Febus que se'n va viénguer véder Gaston entà'u perdonar mes com aqueth que s'arrefusa de minjar e que Febus lo hereish dab ua daga en bèth ensajar de'u forçar, qu'apareish que emofil, Gaston e's moreish suu pic.

Tornada en Bearn entà'u sepelir, Agnès, per herir Febus, qu'ensaja de'u convéncer que n'èra pas lo son hilh mes dilhèu lo hilh de Mahaut o quitament un nenet crompat a quauque gus. Febus, malurós per Gaston mes revoltat per lo comportament d'Agnès qui n'esita pas a abaishar la soa memòria sonque entà alebar lo son orgulh, que's mòstra indiferent.