Campanha de Russia (1812)

Un article de Wikipèdia, l'enciclopèdia liura.
Pintura representant la retirada de l'emperaire Napoleon Ièr e de sa garda dins lo corrent de l'ivèrn rus de 1812.

La campanha de Russia foguèt una operacion militara menada còntra l'Empèri rus per l'emperaire Napoleon Ièr en 1812. Son objectiu èra de constrénher a aplicar lo blocus continentau còntra lo Reiaume Unit. Per aquò, mobilizèt una armada fòrça importanta (mai de 600 000 òmes[1]) au sen de l'Empèri francés e de seis estats vassaus[2].

L'ofensiva principala acomencèt lo 22 de junh e se dirigiguèt vèrs Moscòu. En despiech de l'utilizacion de la tactica de la tèrra cremada e de doas temptativas importantas per arrestar l'invasion a Smolensk (16-17 d'aost de 1812) e a Borodino/La Moskowa[3] (7 de setembre de 1812), lei Rus deguèron se retirar e laissar lei Francés ocupar l'anciana capitala dau país lo 14 de setembre. La vila foguèt pilhada e cremada. En revènge, dins lei regions baltas, capitèron de blocar leis ofensivas francesas en direccion de Sant Petersborg. Ansin, maugrat lei pèrdas infligidas per Napoleon e l'ocupacion de Moscòu, l'emperaire rus refusèt de negociar la patz. Lo 23 d'octòbre, lei Francés deguèron abandonar Moscòu en causa de dificultats d'avitalhament que foguèron rapidament agravadas per l'ivèrn e lo secutament dei convòis francés per de tropas d'irregulars rus. Una retirada fòrça malaisada fins a Polonha se debanèt donc fins au 14 de decembre. L'armada francesa i perdèt de centenaus de milièrs d'òmes e la màger part de son artilhariá e de sa cavalariá. En revènge, capitèt de resistir ai temptativas de l'armada russa de l'anientar definitivament.

La campanha s'acabèt donc per una revirada grèva dei fòrças francesas maugrat de pèrdas pron equilibradas (380 000 per lei Francés, 335 000 per lei Rus). D'efèct, lo prestigi francés èra d'ara endavant fòrça demenit entraïnant una revòuta de la màger part deis estats europèus còntra l'òrdre napoleonenc. De mai, lei Francés avián subretot perdut de fòrças regularas e experimentadas e un nombre tròp important de chivaus per tornar constituïr sa cavalariá. Òr, la tactica napoleonenca necessitava l'utilizacion d'una cavalariá importanta per perseguir e destrurre lei fòrças enemigas vencudas sus lo prat batalhier. Ansin, Napoleon poguèt pas donar un aspèct decisiu a sei victòrias de 1813-1814 e França foguèt finalament vencuda en 1814.

Liames intèrnes[modificar | Modificar lo còdi]

Bibliografia[modificar | Modificar lo còdi]

Nòtas e referéncias[modificar | Modificar lo còdi]

  1. En 1812, aquò èra l'armada pus importanta de l'Istòria europèa.
  2. En particular, lo Grand Ducat de Varsòvia organizèt una fòrça de 100 000òmes.
  3. Borodino es lo nom rus de la batalha e La Moskowa lo nom francés.